DILI, STLTIMORLESTE.com – Igualdade Jeneru sai nuudar kestaun Direitus Humanus neebe mak konsagra ona iha Konvensaun ONU nomos lei inan Timor Leste nia.
Kestaun nee hatoo husi Embaixador Uniaun Europeia iha Timor-Leste, Marc Fiedrich, liu husi Diskursu bainhira partisipa abertura loja hakbiit Feto iha salaun Rede Feto, Tersa (05/11/2024).
“Igualdade jeneru nuudar kestaun direitus umanus baziku neebe konsagra ona iha Konvensaun ONU nian no mos iha Konstituisaun no lei sira Timor Leste nian. Hirak nee laos direitu neebe feto Timor tenke husu ba se deit. Direitu sira nee eziste kleur ona. Sira metin iha lei no sira nee ita boot sira nian, nuudar sidadaun Timoroan atu reklama no uza,” katak embaixador.
Embaixador hatete, Kualker obstakulu neebe feto Timoroan sira hasoru bainhira asesu ba sira nia direitu, nuudar violasaun direitus umanus no presiza atu rezolve, husi feto sira individualmente no mos liu husi esforsu sira neebe organiza koletivamente.
“Iha nee mak hau hakarak hatoo pontu ida kona-ba importansia husi sosiedade sivíl neebe organizadu, importánsia husi ema sira neebe halibur forsa iha asaun sira ba hadiak sira nia komunidade. Hamutuk, ita boot bele fahe ita boot nia esperiensia sira no ajuda malu. Hamutuk, ita boot bele reprezenta kestaun sira neebe la hetan atensaun neebe lo-loos sira merese. Hamutuk, ita-boot bele responsabiliza autoridade publika sira bainhira sira la kumpre promesa sira neebe halo ona,” katak nia.
Nia hatete, Sekretaria Estadu konserteza sei konkorda, tanba nia halao loron-loron, katak luta nee luta ida neebe tenke kontinua, no katak luta nee sei kontinua, husi feto ba feto, husi grupu feto ba grupu feto, no espera katak iha mos mane sira hola parte.
Tanba direitu sira neebe hatuur iha lei no polítika sira nee diak tebes, maibe buat neebe importante duni mak sira goza direitu sira nee iha moris real ka lae.
Nunee mos Reprezentante Adra Timor Leste, Sanjay mathey hatete, preokupasaun sira neebe eziste kona-ba disponiblidade espasu adekuandu ba grupu feto sira atu halo konsolidasaun ba sira nia projetu sira.
ADRA TL hamutuk ho parseiru Rede Feto fo formasaun oin-oin ba grupu feto sira iha munisipiu 4 liu husi implementasaun programa kampu ba agrikultura sira rai no imprestimu osan formasaun bazika konaba literaria no negosiu no fornesementu ekipamentus prosesamentu.
Nunee mos sekretariu Estadu ba Igualdade (SEI), Elvina Sousa Carvalho hatutan, parte sosiedade sivil servisu hamutuk ho governu luta makaas ba assuntu direitu feto no husu kontinua luta ba oin.
“Luta ida nee tenke kontinua no luta ida koletivu laos SEI RFTL deit maibe luta koletivu no kontinua,” katak nia.
Prezidente Konselhu Diretoria Rede Feto Timor Leste, Zelia Fernandes hatete, tinan barak nia laran Rede Feto halo advokasia no prevensaun ba violensia bazeia ba jeneru no violensia domestika.
“Enkuadramentu legal oin-oin iha ona hanesan lei kontra violensia domestika no iha mos projetu spontline hodi kontribui ba prevensaun violensia bazeia ba jeneru sosializasaun sira no komferensia sira no seminariu neebe mak realiza ho hanoin atu kontribui ba prevensaun,” katak PR RFTL.
(eme)
