DILI, STLTIMORLESTE.com – Relasiona ho publiku balu nia preokupasaun kona-ba imajen Primeiru Ministru (PM), Xanana Gusmão iha kapa Kodigu Sivil anotadu ba lian tetun, Ministru Justisa deklara, PM hanesan figura nasional, no tau foto nee hanesan prezerva memoria.
“Ita hotu-hotu dehan katak fotografia nee la serve iha razaun hodi halo kritika, mas hau nia pontu de vista hanesan ema pesoal figura Xanana figura ida neebe notoriamente ema hotu nia konhesimentu sai hanesan figura nasional ida ho lider sira seluk,” dehan Ministru Justisa, Sergio Hornai ba jornalista sira iha Salaun Maukoha, Surikmas Tersa, (05/08/2025).
MJ hatutan, iha esperiensia balu ema tau iha moeda figura balu neebe sira haree kontribui makaas ba rai ida nee sira tau, atu bele prezerva memoria prezerva ema nee nia personalidade tanba kontribuisaun balu neebe mak iha.
Sublina, MJ temi hela problema nee iha neebe, serake ho fotografia nee kontein buat ruma neebe la kontribui ba iha sosiedade, bele infrakeza direita ka indireita ita nia sistema hirak nee hotu buka hatene.
Tuir prespektiva MJ nian, lider sira lubuk ida hahu kedan husi Primeiru Ministru Xanana Gusmao, Lu-Olo, Mari Alkatiri no Taur Matan Ruak, Lere Anan Timur hanesan patrimoniu Nasional, tenke haree iha pontu de vista ida neebe pozitivu, tau sira hanesan figura, mezmu iha pontu situasaun balu propriu maibe tenke haree ba iha hanoin buat neebe pozitivu. Tanba ho sira ohin loron ita bele sai Estadu ida independente, esforsu koletivu oriente no dirije ita, nunee merese atu bele fo respeitu ba iha figura sira nee.
MJ afirma, ida nee laos signifika fo admisibilidade tanba banhira iha lansamentu iha ona sampul kona-ba livru ida nee sai tiha ona.
Dehan tan, konserteza iha sosiedade ema ruma ladun kontente, maibe se sosiedade em jeral la tau problema, bele haree mos husi nee.
Iha fatin ketak, Akademiku UNTL, Rafael de Jesus dehan, publiku preokupa kona-ba imajen refere, tanba nee parte relevante sira presiza fo justifikasaun.
“Publiku preokupa nee normal, importante mak parte relevante tenke fo justifikasaun ida klaru, hodi labele hamosu duvidas iha sosiedade nia leet,” dehan nia.
Hatutan tan, PM hanesan lider neebe ema hotu hatene, tanba nee normal tau nia foto, maibe importante mak ho esplikasaun neebe klaru atu labele hamosu duvidas iha sosiedade sira.
(ter)
