DILI, STLTIMORLESTE.com – Diresaun Jeral Servisu Migrasaun liu husi Setor Operasional iha Sesta feira nee halo operasaun rutina iha area Dili laran no konsege identifika sidadaun estranjeiru mane ida ho naran inisial AES, halo atividade komersiu ilegal iha Aldeia Palapaço, Suku Motael, Munisipiu Díli.
Tuir Komunidade Media Ministeriu Interior nian neebe STL asesu katak, iha Ekipa Servisu informasaun konsege identifika sidadaun nee, aluga uma no hela iha area Bebonuk, nia mai husi nasaun orijem Egypto, maibe uza vistu turista hodi halo fali atividade komersial ho kareta marka Nissan, B.20-262 hodi faan sasan eletronika ba komunidade sira iha kapital Dili.
Depois Sidadaun nee Mmigrasaun aplika selu multa ba nia tuir lei Migrasaun no Azilu númeru 11/2017, artigu 143, konaba halao atividades profisional la ho autorizasaun. Artigu nee deskreve katak, halao atividades profisional independente ou halo servisu ba ema seluk, husi estranjeiru neebe laiha vistu ou autorizasaun residencia adekuadu sei aplika koima US$ 200 too US$ 1000.
Ekipa servisu sekreta mos prende kedas kareta refere no hetan evidensia sira hanesan televizaun smart TV 3, mixer 2, rice coocker 3, Speaker Bluetooth 1, blender 1 no-mos fugaun eletrik 1 hafoin entrega kedas ba Xefe Investigasaun Kriminal Migrasaun hodi halo prosesu kontinuasaun no kontinua intensifika area kobertura hodi identifika rede transaksaun seluk tan iha territoriu nasional.
(jen)
