DILI, STLTIMORLESTE.com – Estudantes husi Eskola Sekundariu Jeral FINANTIL balun durante nee la partisipa iha aula, too ezame mak mai eskola, no sira simu karta xamada bolu inan aman, maibe karik la mai nee hasai sira nia oan husi eskola.
Diretor Eskola Sekundariu FINANTIL, Aniceto Berlelo esplika, kuandu karta legal neebe mak eskola fo ba inan aman lakohi mai nee hasai oan husi eskola, tanba nee la kumpri ona regras no labele tolera, tanba estudantes la rekonhese aan, se estudantes nee la mai eskola hasai nia husi eskola, tanba too atu ezame mak mai nee atu aprende saida.
“Estudantes neebe faltozu nee karta xamada tenke ba sira, xamada primeiru, segundu, terseiru, nee regulamentu interna, segundu dada fali ba regulamentu neebe aprova iha Ministeriu artigu 28, kuandu estudantes sira neebe la mai partisipa iha sala de aula, eskola tenke fo xamada, kuandu labele ona sai, se nia mai ezame deit nee aprende saida, laos mai haree deit sertifikadu, maibe partisipa iha aula para bele kompriende siensia neebe diak ba ninia futuru,” dehan Aniceto ba jornalista STL iha nia knaar fatin Aimutin, Segunda nee (14/07/2025).
Nia hatutan, ohin estudantes balun la partisipa iha ezame, nee tanba kada loron la mai tuir aula, dala ruma profesor haruka halo TPC la halo, ho ida nee profesores turma no profesor materia, loron-loron la mai, sira mai deit ezame, nee labele, too atu ezame mak estudantes sira mai barak, tanba eskola FINANTIL iha nia regulamentu.
“Sira ida ohin mai nee ita fo hela karta xamada ba sira, tanba inan aman la mai, tanba nee Eskola FINANTIL tau regulamentu neebe rigorozu para ba oin sira tenke respeitu regulamentu iha eskola. Ami bolu inan aman mai para deklara tanba saida sira nia oan nee la mai eskola, tanba sala ida mak inan aman lakohi kontrola iha uma,” katak nia.
Iha fatin seluk, Diretor EBC 10 Dezembru Komoro, Calistro A. Guterres dehan, ohin estudantes balun husi eskola ida nee too ezame mak foin mosu mai, maibe husu sira lori ho inan aman mai, tanba durante nee nunka partisipa iha prosesu aprendizajen husi profesores sira.
“Ita nian estudantes balun husi eskola ida nee durante nee sira la partisipa iha ensinu aprendizajen, maibe too ezame mak mai deit,” dehan nia.
(jac)
