DILI, STLTIMORLESTE.com – Assosiasaun Defisiensia Timor Leste (ADTL) halo koordenasaun neebe diak ho ema hotu, hodi enkoraza inan aman sira bele apoiu oan neebe ho kondisaun defisiensia sira nian estudu no lori oan ba eskola neebe besik.
Lia hirak nee hatoo husi Koordenador Empoderamentu iha ADTL, Evaresto da Conceicao ba STL iha nia knaar fatin, Sabadu nee (26/10/2024).
“Hau nian mensajen ba ita nian ina aman, komunidade sira neebe mak iha area remotas sira atu labele husik oan sira iha uma, labele kesi oan sira iha uma, labele nafatin ho paradigma tuan, neebe mak ho moe, hodi sulan deit oan sira iha uma, maibe ho lema ida dehan katak, la husik ema ida hela iha kotuk, entaun husik ita boot sira nia oan sira atu bele aprende, karik oan sira hasoru difikuldade hanesan mobilidade sira neebe mak fasilita oan sira, nafatin bele kordena ho ADTL,” dehan nia.
Nia hatutan, atu ADTL bele liga nafatin ho ema hotu neebe bele tau matan ba oan sira neebe mak hakarak kontinua sira nian estudu ou servisu balun neebe sira halo, nafatin esforsu no enkoraza nafatin inan aman atu husik moe nee ba kotuk lori oan sira avansa ba oin liu husi dalan asesu ba edukasaun.
Nunee mos Mariana Nunes da Costa Martins hanesan defisiensia hatete, oan sira iha direitu asesu ba edukasaun, liu-liu maluk defisiensia sira iha area remotas, familia presiza lori oan ba eskola neebe besik, maibe nee depende ba familia idak-idak nian.
“Hau sente oan sira iha direitu asesu ba edukasaun, liu-liu maluk defisiensia sira iha area remotas, familia presiza lori oan ba eskola neebe besik, maibe nee depende ba familia idak-idak nian konsiensia,” nia afirma.
Entretantu Direitor Nasional Edukasaun Inkluzivu Asaun Sosial Eskolar (DNEIASE), Fernando Soares katak, husu konsiensia familia nian, liu-liu inan aman oinsa mak haruka oan neebe defisiensia ba eskola, tanba sira iha direitu asesu ba edukasaun hanesan ho sira nian kolega sira, labele husik sira iha uma, maibe presiza lori sira ba eskola.
(jac)
