SUAI, STLTIMORLESTE.com – Prezidente Republika (PR), Jose Ramos Horta husu inan aman sira hadomi malu no hakribi violensia iha familia.
Prezidente Republika hatoo kestaun nee, liu husi nia diskursu bainhira vizita Eskola Sekundaria Jeral Publiku Suai, Sesta nee (28/03/2025).
Prezidente Republika hatete, iha familia bainhira inan aman sira istoria malu ou baku malu halo labarik kiik sira trauma no la fokus estuda, tanba nee husu inan aman nafatin hatudu domin ba malu, nunee bele fo tempu ba oan sira estuda, tanba futuru nasaun iha labarik sira nia liman.
Prezidente Republika dehan, futuru iha labarik sira nia liman, maibe ema neebe mak kaer nasaun presiza mos matenek, atu sai matenek liu husi estuda, laos iha eskola deit maibe iha uma mos kontinua estuda, no inan aman mos papel importante oinsa bele tau matan ba oan sira.
“Inan-aman sira tau matan ba kosok oan sira didiak. Bainhira iha violensia domestika iha uma laran, labarik sira trauma, nee hau garante la fokus ba estuda, hau bele hatete zero, bainhira labarik sira hetan stres. Tanba haree violensia, aman baku inan ka sira hakilar, baku labarik sira, hau garante sira la estuda, inposivel,” dehan PR Horta.
Prezidente Republika hatete, iha familia laran inan aman sira presiza hadomi malu no respeita malu, nunee bele tau matan no eduka oan sira hahu husi uma laran sai ba eskola. “Nee duni iha uma laran tenke hamaus malu, tenke respeita malu,” dehan PR Horta.
Prezidente Republika dehan, feto Timor matenek, tanba feto nia kakutak mamar liu mane nian. Feto mak diak liu matenek, siensia fízika, siensia teknolojia, feto barak liu. Nee duni tenke buka respeita inan, alin feto, ho kiik oan sira,” dehan PR Horta.
Iha biban nee Pezidente Republika husu joven foinsae sira labele baruk atu estuda, tanba futuru nasaun iha labarik sira nia liman.
“Nee duni, estuda, estuda, estuda didiak, tanba futuru ba nasaun, imi mak futuru ba nasaun,” dehan Prezidente Republika.
Prezidente dehan, se hakarak atu ba servisu iha rai liur, Australia, Korea, Japaun, Alemanha diak liu ba kursu ida tekniku profisional.
“Balun kritika ba liur sai ema nia atan, iha mundu nee trabalhador oin-oin, estranjeiru oin-oin iha Amerika. Ema balun ba Amerika kiak rabat rai depois iha neeba sira estuda, sai boot, hau konhese balun. Iha Eropa no Australia mos nunee, maibe ita ba liur nunee buka osan haruka ba família, nee prioridade ida. Ida fali, ba liur sempre aprende língua, aprende servisu foun, sira iha Irlanda ema balun hatete fukit manu fulun. Lae, iha neeba nee fabrika automatika, loron-loron bele oho animal 1 milhaun, tau iha kaixa pakote, tau ba kontainer, frijen depois ba Eropa ba mundu tomak. Purtantu laos fukit manu fulun, hau konhese Timoroan lubuk ida. Ita ba liur se bele aproveita haruka osan ba família. Maibe neineik Timor mos servisu barak sei iha presiza bainhira greater sunrise tama iha kosta sul, servisu barak. Maibe, servisu ba sira neebe halo kursu oan ruma, tekniku profisional,” Katak PR Horta.
Iha biban nee Prezidente Republika hatutan, Governu Timor ho Governu Australia loke eskola tekniku profisional iha kosta sul, la hatene iha neebe, Natarbora ka iha neebe, atu prepara ema ho lian Inglês, kurikulu Australia.
(eme)
