DILI, STLTIMORLESTE.com – Madre Izaura do Ceu Soares hatete, inan no aman mak sai mahon ba oan sira, tanba nee presiza hatudu ezemplu neebe diak ba oan sira, nunee sira bele ba nati tuir.
“Inan Aman sira nafatin fiel ba malu no fiel ba juramentu neebe halo iha altar, no kumpre nafatin juramentu nee hodi tau matan ba oan sira, tanba Maromak fo ona ba sira hanesan grasa boot ida, atu nunee sira bele lao tuir dalan Maromak nian,”katak Madre Izaura ba STL iha nia knaar fatin, Pantai Kelapa, Dili, Kinta (11/09/2025).
Iha fatin hanesan, Madre Asti Soares hatutan, moris hamutuk sempre iha problema, maibe problema nee laos halo atu fahe malu, maibe nafatin fiel ba juramentu neebe maromak kesi hamutuk ona iha altar lulik.
“Hau nia mensajen ba familia sira iha liur neeba no sira neebe mak hahu husi inisiu ate agora familia moris hakmatek ita agradese, nomos ba familia barak neebe ho moris mundu nia ohin loron neebe iha pasu barak tebes neebe halo familia barak mos neebe nakdoko, mensajen mak nee bainhira hasoru problema iha familia nee normal diferente idea iha familia nee normal maibe atu dehan deit katak nuudar familia labele haluha katak bainhira forma familia nain rua nia hakarak tanba domin neebe Maromak fo, nain Maromak kesi sira nia domin metin liu tan liu husi sakramentu matrimonio,” dehan Madre Asti.
Madre dehan, maski hasoru situasaun oin oin iha familia husu labele lakon esperansa ba Maromak, tanba ho Maromak bele rezolve problema hotu neebe ema idak idak hasoru iha moris loron loron.
Entretantu Madre Superiora husi Kongregasaun ALMA, Madre Florensia Nebo Hokeng hatet,e inan no aman sira nafatin fiel ba malu, no nafatin respeita malu hodi tau matan ba oan sira.
“Inan ho aman sira mos nafatin hadomi oan sira neebe ho kondisaun espesial, no tenke simu saida mak Maromak haraik ona ba inan aman tanba nee kriasaun husi Maromak,” katak Madre Florensia.
Jornalista: Emerenciana Pinto
Editora: Carme Ximenes
