BAUKAU, STLTIMORLESTE.com – Deskonfia inan rasik baku mate nia oan feto klosan ida ho aifarina kain iha Aldeia Maukale, Suku Gariuai, Postu Administrativu Baukau Vila, Munisipiu Baukau.
Komadante Komando Polisia Munisipiu Baukau, Superintendente João Sancho Pires informa, insidente refere akontese iha loron 23 Setembru 2025 inan ho oan hamutuk hela iha toos ida iha uma sorin derepende inan refere baku nian oan monu ba rai, maibe parte familia la lori ba fasilidade saude nunee iha loron 25 Setembru nee parte meudia vitima hakotu iis iha nia rezidensia Maukale.
“Kazu omesidu iha Maukale Inan rasik baku oan aifarina nia kain iha uma sorin toos laran. Forensik foti dadus nee mak metan no bubu iha liman parte karuk bubu metan iha parte matan loos, ain parte loos no karuk tanba nee ita haree seidauk klaru diak liu lori ba Autopsia para klaru liu nia motivu mate nee,” hateten João Sancho Pires iha knaar fatin Vila Nova Baukau, Sesta (26/09/2025)
Nia sublina, hafoin insidente nee akontese iha loron 25 Setembru nee parte loraik Xefe Aldeia Maukale kontaktu Komando Polisia Baukau liu husi Polisia Investigasaun Kriminal too kedas fatin akontesementu evakua vitima ba Hospital Rejional Eduardo (HoREX) Baukau no iha loron 26 Setembru parte dader transporta ona matebian nia mate isin ba Hospital Nasional Guido Valadares (HNGV) Dili hodi halo autopsia.
Nia fundamenta, prosesu autopsia refere atu haforsa evidensia, tanba insidente refere parte Polisia seidauk hatene motivu lo-loos, maibe aprezenta ona ba Ministeriu Publiku no inan vitima daudaun asegura ona iha edifisiu Komando Polisia Munisipiu Baukau ho Termu Identidade Rezidensia (T.I.R), tanba inan refere ho kondisaun moras metal.
“Informasaun neebe ita hetan inan mos moras mental oituan i oan neebe sai vitima nee mos bibi maten (Hepilopes) agora daudaun ita uza hela TIR ba inan prosesu autopsia lao hela dadus ita hatama ona iha Ministeriu Publiku hein investigasaun tuir mai mak haree asuntu nee,” João Sancho Pires akresenta
Entretantu matebian ho naran Jerelia da Costa Belo idade 25 no inan naran Maria Lurdes idade 60 resin.
Jornalista: Tomas Reis
