BAUKAU, STLTIMORLESTE.com – Vitima dezastre naturais, Albertina Viana husi Aldeia Uligata, Suku Afasa, Postu Administrativu Kelikai Antigu, neebe uma hetan estragus total, maibe la hetan apoiu material rekuperasaun husi Autoridade Protesaun Sivil (APC – sigla português).
Xefe Suku Afasa, Joaquim Fernando Ximenes haktuir, sidadaun refere uma hela fatin hetan estragus total iha tinan 2024, tanba kauza husi anin boot, nunee Autoridade Suku relata kedas dadus ba APC Munisipiu Baukau hamutuk ho benefisiariu seluk, maibe benefisiariu seluk neebe uma estragus katergoria kmaan naran iha lista material rekuperasaun 2025 hodi simu apoiu sira, maibe sidadaun Albertina Viana neebe uma hetan estragus total naran laiha.
“Ferik nee nia uma estragus iha tinan 2024 too agora hela deit ona iha familia nia uma, maibe nia naran la sai fali, hau husu ba Autoridade Protesaun Sivil konsidera ema nee, tanba faluk,” informa Joaquim ba jornalista sira iha Vila Nova Baukau, Sesta (16/05/2025).
Porta voz komunidade Suku Afasa nee husu Autoridade Protesaun Sivil atu identifika dadus ho klaru hafoin implementa programa apoiu material rekuperasaun, nunee labele hamosu preokupasaun, tanba suku relata ona dadus, maibe naran laiha lista, hamosu deskonfia entre Autoridade Suku no vitima dezastre naturais.
“Ami rekomenda ba protesaun sivil para konsidera ema nee faluk laiha ema tau matan, nia agora hela deit ho familia,” Joaquim argumentu.
Hatan ba kestaun nee, Diretor ezekutivu APC, Gui Xavio Vicente hateten, APC simu rekomendasaun hotu husi Autoridade Suku Afasa no apresia, maibe sei haree fali dadus sira hafoin fo solusaun, tanba dadus sira neebe APC Munisipiu Baukau relata ba Nasional rekolha husi ekipa konjunta APC nian hanesan CVTL, PNTL no seluk tan.
(tom)
