DILI, STLTIMORLESTE.com – Polisia Nasional Timor Leste (PNTL) sei buka tuir inan feton ida neebe ba partus nia bebe iha Hospital Nasional Guido Valadares (HNGV) no husik hela durante semana tolu ona.
Nia dehan, iha loron 09 fulan Marsu tinan nee Komandante Eskuadra Kristu Rei hatan telefone husi HNGV no sira ba haree duni bebe foin moris no nia inan husik hela iha HNGV.
“Hau rasik simu telefone husi parte Seguransa HNGV nomos husi ICU nian neebe bebe iha ba, no hau ba too duni HNGV hau haree duni insidente neebe viral iha media sosial katak inan feton ida partus iha HNGV husik hela nia bebe, nia lao lakon tiha,” hatete Komandante Eskuadra Kristu Rei, Inspetor Xefe Polísia Paulino de Carvalho ba jornalista sira iha nia knaar fatin Bekora, Tersa (10/03/2026).
Nia dehan, tanba nee Membru Polisia Nasional Timor Leste (PNTL) buka tuir inan feton neebe husik hela nia bebe iha HNGV nia paradeiru.
“Ami buka tuir ona alin feto neebe ba partus iha HNGV no husik hela nia bebe durante semana tolu iha neeba, maibe ohin dadersan ami hetan ona rezultadu, katak familia husi alin feto neebe partus nia bebe ami hatene ona, maibe alin feto neebe husik hela nia bebe ita seidauk hatene, maibe hau fiar katak aban hanesan nee ita sei hetan rezultadu,” nia deklara.
Nuudar Komandante Eskuadra Kristu Rei sei esforsu hodi buka tuir hodi hetan nia paradeiru, tanba aktus sira hanesan nee krime.
“Husi parte investigasaun katak aktus ida nee krime, tanba husik hela ema ida neebe ita boot kous durante fula 9, depois partus mai ita boot husik, entaun oinsa ita nia responsabilidade nuudar inan no aman ida ba ita nia oan, ho situasaun sira hanesan nee, nuudar Komandante Eskuadra Kristu Rei sei esforsu hela buka tuir nafatin inan feton nee nia paradeiru iha neebe, mais ami hatene ona hein ba foti,” nia informa.
Nia hatutuan, kazu nee sei iha prosesu investigasaun depois aprezenta ba Ministeriu Publiku, tanba nee polisia sei esforsu hodi buka tuir inan neebe husik hela nia bebe iha HNGV.
Observasaun STL nia iha ICU Hospital Nasional Guido Valadares (HNGV) bebe neebe inan husik hela iha HNGV daudaun nee sei iha ICU hodi halo tratamentu neebe diak, tanba bebe moris mai la susu inan nian susu-been, tanba nee kondisaun ladun diak tenke baixa iha HNGV atu nunee hetan atendimentu husi mediku sira iha HNGV.
(jen)
