BAUCAU, STLTIMORLESTE.com – Hahu husi Janeiru too agora numeru inan isin rua neebe mate iha HoREX Baukau hamutuk nain rua, tanba problma stok raan laiha iha Hospital Rejional Eduardo Ximenes (HoREX) Baukau.
“Raan mak la sufisiente, tanba bainhira presiza atu tau raan, raan laiha, entaun inan isin rua nee mate hamutuk ho nia bebe, ita fo hatene mos ba inan sira no família sira atu ajuda raan maibe kadaves família balun mai husi dook, no ita esforsu buka maibe la heta, entaun mate,” hatete Xefe Departamentu Sala Maternidade, Bernardina Freitas Marcal ba jornalista sira iha nia knaar fatin HoREX Baukau, Kinta (21/11/2024).
Ekipamentu tuir nia iha hospital nee sufisiente para doutor sira halo atendimentu ba pasiente, maibe raan mak la sufisiente atu ajuda lalais pasiente.
“Inan isin rua iha HoREX nee balun ita transferensia ba Dili, tanba mos impaktu kondisaun grave liu, liu-liu inan sira neebe mak raan menus, sira nee mak presiza transferensia ba HNGV,” nia dehan.
Iha fatin hanesan, Diretor Ezekutivu HoREX Baukau, Claudino Ximenes deklara, wainhira pasiente nia familia presiza raan A, depois hospital ho familia pasiente esforsu hodi buka raan, atu nunee fo pasiente neebe persiza raan, tanba nee impaktu hodi labele salva lalais ema nian vida.
Nunee mos Pasiente Teresa António Marcal, ho tinan 41 koalia, atendimentu iha HoREX lao diak tebes, maibe Ministeriu Saude tenke harii Banco de Sangue para hodi rai raan sira neebe familia pasiente hasai no doadores sira hasai hodi tulun pasiente liu-liu inan isin rua sira.
(jen)
