OEKUSI, STLTIMORLESTE.com – Governu liu husi Institutu Nasionál Kombate HIV-SIDA (INCSIDA, I.P) husu Oekusi oan tenke kuidadu aan husi virus HIV-SIDA, para nunee bele dezenvolve Oekusi sai sidade ba beibeik.
Prezidente INCSIDA, I.P, Daniel Marçal hatete, dezenvolvimentu iha Oekusi komesa iha mudansa ona, husi Dili mai Oekusi uza ona aviaun, estrada diak ona, maibe lori mos problema mai, tanba saude mos sai problema hotu.
“Ami mai fali iha neebe tanba problema, Oekusi agora sidade ba beibeik. Hau rona Oekusi oan mak ukun ona, uluk ema seluk mak ukun, jadi Oekusi ba oin ona. Entaun ema Oekusi oan tenke kuidadu aan husi virus HIV, sei lakohi kuidadu aan loron ida ema seluk mak sei mai servisu fali iha nee no Oekusi oan tama ospital no nemu aimoruk loro-loron,” hatete Daniel Marçal liu husi nia deskursu iha Sede Suku Naimeko, Postu Administrativu Pante Makasar, Munisipiu Oekusi-RAEOA, Segunda (22/09/2025).
Nia katak, maluk sira husi Indonesia hakarak mai haree Oekusi husi fronteira neebe sira bele hakat deit, iha rai seluk sae ro no aviaun maka foin hakat ba rai seluk, mais iha nee hakat deit, tanba nee parte HIV-SIDA nee tenke kuidadu.
Nia informa, seksu livre iha Munisipiu 13 inklui RAEOA, liu-liu Pante Makasar neebe besik hela Kefa no Atambua.
“Familia ita ba mai nee diak, mais kuidadu buat ida seksu livre nee para kuidadu mos ba ita nia saude. Ita nia oan feto no mane sira tenke kuidadu saude, atu nunee labele konaba HIV,” nia informa.
Nia hatutan, INCSIDA mai koalia ba komunidade sira, liu-liu ba Joven sira labele kona HIV. No segundu mai koalia agora para ema labele sai ba SIDA, nee mak agora INCSIDA mai nee.
Iha fatin hanesan Xefe Naimeko, Postu Administrativu Pante Makasar, Munisipiu Oekusi-RAEOA, Marcos liu agradese tebes ba oportunidade, tanba INCSIDA mai hodi fahe informasaun konaba moras HIV-SIDA, tanba daudaun kazu HIV iha Oekusi numeru sae makaas.
“Ita agradese tebes ba oportunidade, hau nudar autoridade lokal apresia tebes tanba ohin INSCIDA mai hamutuk ita iha nee, hodi fahe informasaun HIV-SIDA ba ita hotu. Ita hotu hatene katak, moras HIV dadaun nee iha Oecuse mos numeru as tebes,” nia informa.
Nia hatete, oportunidade ida nee ba dala rua, tanba nee reprezentante povu iha Suku Naimeko agradese tanba hetan oportunidade dala rua hodi rona informasaun HIV-SIDA, tanba husu ba Joven no komunidade jeral rona didiak informasaun ida nee ho diak, atu nunee bele koidadu aan husi moras HIV-SIDA nee rasik.
Nia hatutan, husu ba joven no komunidade tomak atu hotu rona saida mak INCSIDA mai hatoo nee, atu nunee hotu-hotu bele koidadu nian aan, tanba Oekusi nee iha klaran, laiha parede ida atu taka salva. Suku 9 nee ponte entrada boot iha Reziaun Administrasaun Oekusi nian, tanba nee agradese sira mai fo informasaun nee, atu Oekusi oan kuidadu isin lolon.
Jornalista: Jeniche da Costa
Editora: Domingas Gomes
