DILI, STLTIMORLESTE.com – Institutu Nasionál Kombate HIV-SIDA (INCSIDA) realiza sensibilizasaun kona-ba prevensaun moras HIV-SIDA nian ba Autoridade Lokal sira, atu nunee sira iha konhesimentu neebe klean no los hodi proteje sira nia suku no aldeia neebe komunidade hela.
Prezidente Institutu Nasionál Kombate HIV-SIDA (INCSIDA), Daniel Marçal dehan, Xefe Suku no Xefe Aldeia nomos Delegadu sira, sira presiza iha konhesimentu klean no loos oinsa atu bele proteje Aldeia no Suku neebe komunidade sira hela, tanba nee INCSIDA realiza atividade ida nee hodi fo informasaun neebe klean ba sira bele transmite ba kominidade sira.
“Ita haree ema neebe ho moras HIV-SIDA nee barak liu iha Suku no Aldeia sira, nee sira la hatene, laiha informasaun, tanba nee ita nafatin halo sensibilizasaun Xefe Suku no Xefe Aldeia sira,” hatete Daniel Marçal ba STL iha salaun CNE, Díli, Kinta (13/03/2025).
Nia esplika, INCSIDA halao sosializasaun ba Xefe Suku no Xefe Aldia sira mai hodi fahe informasuan kona-ba moras HIV-SIDA ba sira, tanba sira mak besik liu komunidade hodi bele hatun fila-fali informasaun sira neebe sira hetan.
“Ita haree joven barak ladun iha konhesimentu diak, entaun sira kaben sedu, isin rua, hanoin barak tara aan, tanba nee autor ida importante tebes mak Xefe Suku no Xefe Aldeia sira, oinsa mak sira bele halo servisu diak liu tan hodi proteje suku no aldeia,” nia informa.
Nia deklara, tanba nee INCIDA servisu hamutuk ho Estatal hodi konvida Xefe Suku no Xefe Aldeia no Konselhu Suku sira mai rona informasaun, oinsa proteje sira nia komunidade husi moras HIV-SIDA.
Iha fatin hanesan, Xefe Suku Motael, Luis Antonio C. G Vegas hatete, hanesan lideransa iha Suku Motael mai rona informasaun direita kona-ba moras HIV-SIDA oinsa hodi fo informasaun neebe lo-loos ba iha komunidade, nunee komunidade halo prevensaun ba moras nee.
“Hanesan lideransa komunitariu, dever ami nia oinsa atu fahe informasaun tun direita ba iha komunidade sira, tanba ita hatene katak ami nia Suku Motael neebe fatin negosiu barak, ohin ita rona katak iha fatin balu neebe sira uza hodi loke salon, maibe sira uza hodi halo fali ba trafiku humanu nian, tanba nee dever ami nia mai rona informasaun nee hodi hatoo ba komunidade sira,” nia afirma.
(jen)
