DILI, STLTIMORLESTE.com – Institutu Nasional Kombate HIV/AIDS (INCSIDA) halao sosializasaun kona-ba transmisaun HIV-SIDA ho tema “Mai Ita Hamutuk Proteje TL husi Problema Transmisaun Virus HIV” ba Komunidade Suku Fatudere, atu halo prevensaun bá moras HIV-SIDA.
“Ita nia objetivu mai iha nee atu fahe informasaun kona-ba Virus HIV, atu nunee sira bele hases aan husi transmisaun HIV,” hatete Diretora Nasionál Promosaun, Prevensaun no Komunikasaun iha INCSIDA, Angelica Soares da Costa Oliveira ba jornalista sira, wainhira partisipa atividade sosializasaun kona-ba HIV-SIDA, Sede Suku Fatudere, Portu Administrativu Vikeke Vila, Munisípiu Vikeke, Kuarta (30/07/2025).
Nia dehan, INCSIDA halao sosializasaun kona-ba transmisaun HIV-SIDA ho tema “Mai ita Hamutuk Proteje TL Husi Problema Transmisaun Virus HIV” ba Komunidade Suku Fatudere, atu nunee bele komprede liu kona-ba moras HIV-SIDA.
Nia tenik, kona-ba dadus HIV-SIDA nain mak Ministeriu Saude (MS), maibe INCSIDA nia servisu hodi sosializasaun kona-ba HIV-SIDA ba komunidade sira iha suku no area rural neebe menus tebes informasaun HIV-SIDA nee rasik.
“Joven sira bele namora ba, maibe atu foti desizaun hodi halo relasaun seksual tenke tau tanda tanya, ita tenke hatene ninia estatus nee livre husi HIV ga lae no ita husu katak wainhira ema ida halo relasaun seksual ho ema barak tenke halo teste raan iha fasilidade saúde, nunee hatene estatus HIV-SIDA,” nia deklara.
Iha fatin hanesan, Xefe Fatudere, Jeronimo Soares Alves esplika, agradese no apresia tebes ba INCSIDA, tanba bele hakat mai Suku Fatudere hodi hamutuk ho komunidade no halao sosializasaun kona-ba HIV-SIDA ba joven no komunidade sira iha Suku Fatudere.
“Nuudar autoridade apresia no orgulhu tebes ba INCSIDA bele hakat ain mai iha ami nia fatin hodi sensibiliza informasaun kona-ba HIV-SIDA ba ita nia komunidade no liu-liu ba joven sira iha Suku Fatudere tenke halo prevensaun ba HIV-SIDA,” nia informa.
Nunee mos Komunidade Suku Fatudere, Marito Gomes de Araújo apresia no kontente tebes ba INCSIDA neebe hakat mai iha Suku Fatudere hodi sensibiliza informasaun kona-ba moras HIV-SIDA, tanba durante nee komunidade sira nunka mais hatene saida mak HIV-SIDA.
Nia informa, Profisionál Saude sempre halo sensibilizasaun informasaun saude nian, maibe ladun klaru, INCSIDA mak ohin mai koalia klaru no esplika klaru mai Komunidade Suku Fatudere kona-ba HIV-SIDA mak sosializasaun hanesan INCSIDA halo.
“Formasaun hanesan nee loke ona ami nia hanoin, oinsa bele hatene ona hahalok neebe bele hamosu HIV-SIDA, ami apresia tebes tanba programa INCSIDA nee bele lori mai too ami nia Suku no ami bele komprende diak saida mak HIV-SIDA no HIV-SIDA bele iha nee mai husi neebe,” nia afirma.
(jen)
