VIKEKE, STLTIMORLESTE.com – Institutu Nasionál Kombate HIV-SIDA (INCSIDA) marka prezensa iha Suku Luka, hodi hasae konesimentu komunidade nian kona-ba Virus HIV iha Suku Luka, Postu Administrativu Vikeke Vila, Munisípiu Vikeke.
“Objetivu mai iha nee ita hakarak hasae nafatin Konhesimentu kona-ba moras HIV-SIDA, sira iha Konhesimentu ona para bele hasai no bele halo prevensaun ona,” hatete Diretora Nasional Promosaun, Prevensaun no Komunikasaun iha INCSIDA, Angelica Soares da Costa Oliveira ba jornalista sira iha Sede Suku Luka, wainhira halao sosializasaun ba komunidade sira iha Suku Luka, Kinta (01/08/2025).
Nia dehan, INCSIDA nia atividade iha Munisípiu Vikeke atu transmite informasaun ba komunidade sira iha Munisípiu Vikeke.
“Ita fahe informasaun kona-ba HIV-SIDA nomos ita haruka sira hodi hasai raan, atu nunee sita bele hatene sira nia estatus HIV-SIDA,” nia tenik.
Nia esplika, koalia kona-ba redus numeru HIV-SIDA nee kompleksu tebes, maibe INCSIDA kontinua fahe informasaun oinsa atu halo prevensaun bá moras HIV.
“Ita koalia kona-ba HIV-SIDA nee ema idak-idak nia aan, sei nia la kontrola nia aan, entaun numeru HIV-SIDA nee kontinua sae,” nia informa.
Nia deklara, INCSIDA tama sai Suku no Munisípiu sira hodi fahe informasaun kona-ba HIV-SIDA, maibe seksual idak-idak nian, INCSIDA labele kontrola, maibe informasaun halo prevensaun no labele halo seksu livre kontinua fahe.
“Ita tama sai Suku fo Konhesimentu nafatin, maibe seksual nee ita atu kontrola oinsa, ita bele fahe hela informasaun ba ita nian komunidade sira hanesan nee, maibe balun kontinua nafatin halao relasaun seksual livre, maibe ita la baruk fo hanoin nafatin ba sira, atu nunee proteje aan husi Virus HIV,” nia koalia.
Iha fatin hanesan, Xefe Suku Luka, Manuel Gusmão informa, informasaun neebe diak tebes-tebes ba futuru nasaun, tanba nee komunidade tenke iha saude neebe diak, hodi dezenvolve rai ida nee ba oin.
“Ita nia nasaun diak nee ita mós tenke saude diak, entaun ita mos tenke prevene moras HIV-SIDA neebe hadaet lalais liu, maibe kura labele, tanba nee hau sente sosializasaun nee diak tebes no importante ba nasaun no povu,” nia deklara.
Nunee mos Komunidade Serjio Soares Amaral informa, atividade sensibilizasaun kona-ba Virus HIV nee importante tebes ba komunidade sira, tanba moras HIV-SIDA fo risku ba ema nia vida.
“Informasaun neebe ami hetan ohin loron hanesan bukae ida, tanba ami bele komprende liu oinsa mak halo prevensaun no kuidadu ami nia saude ba problema moras HIV-SIDA neebe Timor Leste hasoru,” nia esplika.
Nia husu nafatin ba INCSIDA atu halao atividade sosializasaun nee ba liu baze, atu nunee hodi hasae nafatin Konhesimentu no hahalok komunidade nian hodi halo prevensaun ba HIV-SIDA no bele kompate HIV-SIDA.
“Ita husu ba INCSIDA atu habelar nafatin informasaun hodi hasae nafatin Konhesimentu ba sidadaun hotu-hotu atu kuidadu sira nia saude,” nia afirma.
(jen)
