DILI, STLTIMORLESTE.com – Institutu Nasionál Kombate HIV/SIDA (INCSIDA) halao sosializasaun kona-ba Vírus HIV nian ba komunidade Bekora, atu nunee halo prevensaun ba virus nee.
Prezidente INCSIDA, Daniel Marçal dehan, Timor Leste iha 2013 too 2025 rejistu ema hamutuk 2.400 mak pozitivu ba HIV-SIDA.
“Sei ita la servisu, Timor nee laos foin mak 2.400 maibe barak liu tan. Tan nee ho ita nian sosializasaun hanesan nee ema iha konsiensia hodi hasai raan,” katak nia ba jornalista sira iha Sede Suku Bekora, Kuarta (22/10/2025).
Nia tenik, sei karik iha despaixu ida husi Konselhu Ministru katak, sidadaun hotu-hotu tenke ba teste raan, kazu nee sae makaas.
Nia hatete, ema barak kona HIV, tanba lakohi ba tes raan. Ho atividade hanesan nee ema barak ba tes ona raan. Se HIV hadaet la liu husi seksu nee karik, numeru la boot hanesan nee ida, maibe HIV liu husi feto ida no mane ida.
Nia informa, ho INCSIDA nian sosializasaun nee sidadaun barak mak iha ona konsiensia hodi hasai raan, no hatene halo prevensaun ba virus HIV, tanba nee INSCIDA kontinua fahe informasaun kona-ba vírus nee rasik.
Iha fatin hanesan, reprezentante Prezidente Autoridade Munisipiu Dili (PAM), Jacinto Freitas husu Servisu Saude Munisipiu Dili atu kordena no koopera ho autoridade lokal nomos Prezidente INCSIDA atu bele kontinua sensibiliza informasaun kona-ba vírus HIV ba komunidade sira iha Suku Bekora.
“Ita husu atu sensibilizasaun nee too iha Suku no Aldeia, tanba informasaun nee importante tebes. Hau husu mos Postu Administrativu Kristu Rei kordena no koopera diak ho parte relevante sira, hodi sensibiliza nafatin materia hirak nee ba ita nian komunidade sira,” nia tenik.
Nia hatutan, tanba moras ida nee perigozu tebes ba ema nia saude.
Jornalista: Jeniche da Costa
Editora: Domingas Gomes
