DILI, STLTIMORLESTE.com – Indultu ida neebe agora kondenadu sira atu hetan laiha kriteira hanesan lei ida uluk nian, maibe haree liu ba iha razaun humanitaria.
“Indultu ida agora la iha kriteira, la hanesan ho lei ida uluk kriteira la iha, neebe hau hanesan Diretor Nasional ami fokus liu ba sira neebe idade mais avansadu ho situasaun moras, bele diagnosa katak se karik PR konsidera sira nee hetan indultu karik, sira nee sei produtivu sei halo tan problema ka lae ida nee tetu hotu,” dehan Diretor Nasional Servisu Prizional no Reinsersaun Sosial, Delfio Soares Alves ba jornalista sira iha Kaikoli, Tersa (13/05/2025).
Nia hatutan, lista indultu proponente mai husi Prizaun hamutuk 38 pesoas, neebe enkamina ona ba iha Gavinete Prezidente Republika.
Nia sublina, kona-ba sira neebe proponente fora husi Prizaun seidauk, hanesan sira neebe liu husi familia ka advogadu mak hatama pedidu nee seidauk.
Reforsa, husi numeru neebe iha sira neebe moras bele iha nain 10 ba leten, no sira nee proponente mai husi Diretor Prizaun nain 3 nee.
Diretor nee afirma, lei ida agora atu hetan indultu nee laiha kriteira, no proponente sira neebe mai husi Prizaun mezmu laiha lei, no ida neebe haree fo prioridade liu haree mos ba razaun humanidade bele propoin.
Hatan kona-ba lista nee inklui mos Padre Daschbach nia parte dehan, seidauk serteza no seidauk haree, no lei neebe iha la iha kriteira, maibe haree ba iha razaun humanitaria, no mai husi prizaun rasik.
Iha fatin ketak, Diretor Prizaun Gleno, Cristianho Salsinha dehan katak, Prizaun Gleno sira propoin lista indultu nain 5.
“Ami propoin nain 5 deit, nain 5 nee pedidu husi Prizaun nian, pedidu se husi familia sira ba direta Gavinete Prezidente nian,” dehan nia.
Hatutan tan, sira nain 5 neebe Prizaun propoin, haree ba iha razaun humanitaria, tanba bazeia ba lei neebe iha.
Tuir dadus neebe iha, oras nee daudaun dadur iha prizaun tolu hanesan Bekora, Suai no Gleno akumula dadur hamutuk 669, numeru guarda Prizional foin lalais rekruta tan 100, maibe iha administrativa nia prosesu foin mak hetan 72, falta 28 neebe mak reanunsia hela, no total agora provizoriu hela 300 resin.
(ter)
