DILI, STLTIMORLESTE.com – Ministeriu Edukasaun (ME) liu husi Institutu Nasionál Formasaun Profisionál Dosente no Edukasaun (INFORDEPE) halao asina akordu ho Institutu São João de Brito, kona-ba formasaun preparatoriu ba profesor bolsa kandidatu Ensinu Sekundariu hamutuk 250.
Haktuir Ministra Edukasaun (ME), Dulce de Jesus Soares ba jornalista sira iha sala VIP ME, Vila Verde, Kuarta nee (19/11/2025).
“Ami reafirma katak laiha dezenvolvimentu nasionál bainhira laiha profesór sira neebe forte, preparadu ho kualifikadu tomak. Ami reafirma mos katak Governu ida nee iha vontade atu mobiliza rekursu, instituisaun no parseiru sira hodi garante katak sistema edukasaun Timoroan iha profisionál sira too dezafiu sekulu XXI nian,” esplika ME Dulce.
ME Dulce hatutan, akordu kooperasaun entre Estadu no instituisaun ensinu superiór ISJB nian mak posibilita implementasaun kursu formasaun preparatóriu ba ensinu, ho objetivu ba profesor sekundariu hamutuk 250 husi grupu kandidatu sira.
“Kursu ida nee, tanba responde ba nesesidade real husi ita nia eskola sira no tanba inkorpora vizaun moderna kona-ba formasaun ba profesor sira. Ami laos oferese deit kursu seluk, maibe ita implementa etapa foun iha profisionalizasaun ensinu iha Timor Leste, Institutu São João de Brito hatudu no sai hanesan parseiru exelente ida. Ministeriu Edukasaun rekonhese publikamente ninia meritu institusionálal, rigor akademiku, kompromisu ba kualidade, dedikasaun klean ba espiritu servisu nian, kompromisu etiku no kontribuisaun lo-loos neebe halo ona ba nasaun,” dehan nia.
“Tanba nee, eskola husi Institutu São João de Brito laos sirkunstansia, hanesan rezultadu husi konfiansa polítika no institusional iha servisu seriu no komprometidu neebe imi dezenvolve loron-loron iha imi nia instituisaun,” katak nia.
Entretantu, Prezidente INFORDEPE, Domingos Martins hatete, implementasaun kursu preparatoriu ba professor sira neebe destina ba profesor sekundariu hamutuk 250, husi grupu kandidatu sira neebe foin lalais integra iha kareira dosente sei akontese, profesor 125 iha faze I, neebe sei implementa husi loron 1 too 12 fulan Dezembru, no faze II neebe sei iha profesor sira iha faze implementa husi loron 8 too 13 fulan Dezembru tinan nee. Objetivu prinsipal husi kursu ida nee mak atu asegura katak profesor foun sira neebe foin tama iha profisaun dosente iha abilidade pedagójiku, tékniku no életika neebe nesesariu atu garantia edukasaun ho kualidade iha eskola hotu-hotu iha rai laran.
“Programa nee dezeña atu sai ezijente, avaliativu no foka ba pratika pedagójika, hodi garante katak partisipante sira kompleta formasaun ho domíniu ba area esensial sira neebe define husi Ministeriu Edukasaun,” nia haktuir.
Jornalista: Jacinta Sequeira
Editor: Xisto Mendonça
