DILI, STLTIMORLESTE.com – Instituto Nacional de Formação de Dosente e Professionais da Educação (INFORDEPE) kapasita formasaun ba profesores hamutuk 48.
Serimonia abertura formasaun ba profesores 48 nee halao iha salaun Ian Martin Balide, abertura husi Ministru Edukasaun (ME) Interinu, Domingos Lopes Lemos no akompanha husi Prezidente INFORDEPE, Domingos Martins.
Prezidente INFORDEPE, Domingos Martins dehan, INFORDEPE konvida profesores 48, sira nee balun Diretor no Adjuntu. Sira nee laos jere deit administrasaun, maibe sira hanorin mos iha disiplina balun.
“Formasaun loron 3 nee ami konvida 48 professores mai iha nee, atu hetan kapasitasaun ba digitalizasaun no inovasaun formasaun informasaun no teknolojia, liu-liu ba iha era digitalizasaun. Ho nunee mak INFORDEPE konvida professores 48 nee. Sira nee laos jere deit administrasaun, maibe sira hanorin mos iha disiplina balun. Laos professores multimedia deit, maibe professores balun hanorin iha disiplina sira seluk,” hatete nia ba jornalista iha salaun Ian Martin Balide, Tersa (28/10/2025).
Domingos hatutan, atu kapasita profesor sira, aleinde ida nee tama ona iha era ida formasaun online no of line, ho ida nee mak ho intensaun konvida sira, atu nunee sira mos família ba instrumentu hirak neebe mak importante, hodi bele implementa iha prosesu ensinu aprendizajen. Atividades formasaun nee sei halao durante loron 3 nian laran.
“Fundu ba formasaun nee rasik mai husi INFORDEPE, diresaun ensinu sekundariu jeral no UNESCO. Montante nee hau labele koalia sai, maibe atu dehan deit atividades nee mai husi fontes 3 neebe hau mensiona,” dehan nia.
Nunee mos Ministru Edukasaun (ME) Interinu, Domingos Lopes Lemos dehan, formasaun nee konaba teknolojia inovativu, neebe mak fokus liu ba eskola sira. Dala barak eskola sira ba prosesu hotu tenke halo inovasaun ida. Durante nee prosesu neebe mak implementa iha eskola nee, tanba ohin abertura ba formasaun, liu-liu eskola sekundariu 24,tanba 24 nee ninia komputador prepara hotu ona,atu nunee sira bele implementa.
“Ohin ami abertura formasaun ba ita nian professores sira,ita nian professores neebe partisipa iha formasaun nee,mai husi nibel sekundariu,nee mak hanesan Direitor eskola hotelaria nia adjuntu hamutuk 48 profesores,” katak nia.
Jornalista: Jacinta Sequeira
Editora: Domingas Gomes
