DILI, STLTIMORLESTE.com – Institutu Nasional Farmasia Produtu no Medikamentu (INFPM) selu ona Kompanhia Salimago kuaze milhaun US$ 4.2, tanba nia hatama ona aimoruk 96%.
“Iha semana rua liu ba ita update pagamentu ba kuaze milhan US$ 4.2, tanba nia hatama ona sasan. Ita kompara ba pursentu kuaze 65 too 0% ita halo pagamentu ona,” hatete Diretor Ezekutivu INFPM, Brígido Simao Dias Deus ba jornalista sira iha salaun INFPM Kampung Alor, Dili, Sesta (25/10/2024).
Nia esplika, Kompanhia Salimago hatama aimoruk dezde hahu kontratu nee, komesa iha Dezembru mai too iha inisiu Outubru nee.
“Kuaze hatama 96%, aimoruk tama ona husi total 930 ital item neebe mak nia tenke ser hatama, 96% nia hatama tiha ona. Agora iha armazen balu fahe daudaun ona no balu uza hotu tiha ona,” nia informa.
Nia deklara, signifika Kompanhia Salimago seidauk hatama hotu aimoruk item balu, maibe nia taka ho seluk. Purezemplu iha reazente balun neebe ema halo reazente nee kada fulan ida deit.
“Kuandu hahu loke nia tenke uza iha fulan ida nia laran, kuandu la uza nia tenke expire, entaun sira tenke koordena didiak ho fabrika atu bele bainhira mak produs, bainhira mak too iha nee, no bainhira mak loke para uza, ida nee tenke ser kalkula hotu,” nia informa.
Nia haktuir, tanba nee mak kompanhia sei esforsu hela ba ida nee. Se karik nia labele hatama, bele buka item seluk neebe mak nesesariu presiza duni, maibe labele book orsamentu.
Nia afirma, Kompanhia Salimago nia kontratu mate ona, foin mak halo renovasaun iha fulan Julhu, tanba sira hatama kedas aimoruk iha Dezembru 2023.
(jen)
