DILI, STLTIMORLESTE.com – Problema infraestrutura sai preokupasaun Eskola Sekundariu Jeral FINANTIL, tanba eskola refere presiza halo konstrusaun foun.
Haktuir Diretor Eskola sekundariu Jeral FINANTIL, Aniceto Berlelo ba jornalista STL iha nia knaar fatin Aimutin, Kinta (13/11/2025).
“Defikuldade neebe mak ami enfrenta iha nee mak problema infraestrutura. Ida nee mak sai defikuldade mai ami, kuandu ezame mak udan, ida nee mak ami nian defikuldade, maibe seluk laiha. Nee duni infraestrutura mak sai preokupasaun eskola nian, pedidu nee ami halo haruka ba ona no sira mai sukat dala hira ona, espera tinan oin nunee sira bele haree ida nee, tanba eskola nee moru mos atu monu ona,” nia dehan.
Nia hatutan, sala de aula iha parte sorin nee ba nee moru atu monu ona, nee duni sira husi parte edukasaun mai haree tiha ona, sala tolu deit mak ninia kondisaun diak, maibe restu husi ida nee tenke halo konstrusaun foun fali.
Iha fatin seluk, Carlos Correia nuudar Diretor Ensinu Baziku Central (EBC), Manleuana hatete, sala 14 neebe mak ME ho MAE atu halo konstrusaun foun nee halo andar hotu. Tuir informasaun husi ME nian dehan hahu fulan ida nee atu halo ona no husi MAE ninia sei hahu iha Janeiru de 2026.
“Ami nian sala de aula nee mak sira mai haree ona, atu baku rahun ami nian eskola sorin nee, ami nian sala sanolu resin haat nee sei halo husi ME ho MAE, sira atu halo andar hotu. Horiseik sira mai haree ona, ME sei halo sala ualu no MAE sei halo sala neen, nee mak sala hamutuk sanolu resin haat nee,” dehan Correia.
Nunee mos Cesarina Correia Guterres nuudar Superintendente Edukasaun Munisipiu Dili dehan, kona-ba kondisaun infraestrutura iha ESJ 5 de Maio konstrusaun sala 8, maibe agora daudaun paradu hela. EBC Manleuana uma tomak 1 iha sala 4 maibe ho kondisaun aat hotu. EBF mota ulun presiza halo konstrusaun ba sala de aula.
Entretantu Diretor SEM Manatuto, Patricio da Cruz Quintao hatete, kona-ba fasilidade no infraestrutura eskola nee sira nian inspetores sira mak halo monitorizasaun, hodi identifika kondisaun eskola no atividades hotu neebe lao iha eskola idak-idak no eskola balun presiza halo reabilitasaun no konstrusaun foun no balun presiza atu aumenta sala de aula ba estudantes sira.
Jornalista: Jacinta Sequeira
Editora: Domingas Gomes
