MANUFAHI, STLTIMORLESTE.com – Sekretariu Estadu Komunikasaun Sosial (SEKomS), Expidito Dias Ximene rekonhese, infraestrutura ba transmiter Radio Televizaun Timor Leste, Empreza Publiku (RTTL,EP) iha Postu Administrativu Same, Munisipiu Manufahi, prezisa halo reabilitasaun, tanba konsidera kondisaun aat.
Husi vizita Primeiru Ministru (PM) Kay Rala Xanana Gusmão nian iha Munisipiu Manufahi, Sekretariu Estadu Komunikasaun Sosial, Expedito Dias Ximenes aproveita oportunidade observa direita kondisaun infraestrutura iha transmiter RTTL,EP nian iha Munisipiu Manufahi neebe harii iha tinan hirak liu ba no iha tinan 2007 dirijente RRTL,EP halo ona reabilitasaun, maibe daudaun kondisaun aat.
“Hau haree daudaun kondisaun transmiter iha Same Manufahi nian nee presiza duni halo reabilitasaun atu kria kondisoens neebe diak liu tan, tanba transmiter ida nee iha 2007 iha hau nia lideransa Prezidente RTTL,EP halo reabilitasaun balu, maibe husi 2007 too agora konserteza prezisa hadia,” hateten SEKomS Expidito Dias Ximene ba jornalista sira hafoin remata nia observasaun ba kondisaun transmiter RTTL,EP iha Same, Domingo (08/03/2026).
Eis Prezidente RTTL.EP nee konsidera, transmiter mak nuudar fuan ba atu transmiti informasaun sira liu husi televizaun no radio hodi fo asesu ba komunidade sira liu liu iha Munisipiu Manufahi.
Nunee iha vizita nee SEKomS observa direita hatene ona kondisaun reel neebe funsionariu infrenta iha transmiter RTTL,EP no husu atu Governu tau atensaun liu husi reabilitasaun infraestrutura ba transmiter RTTL, EP iha Same hodi transmiti informasaun sira ba komunidade iha Munisipiu Manufahi no ba Mundu.
“Neebe hau hein katak ida nee mos konserteza haree kapasidade iha Orsamentu Jeral Estadu, maibe hau tenta esforsu atu bele aprezenta ida nee iha KRO 2027 mai kondisaun hotu hotu ba transmiter iha Munisipiu hotu,” Expidito komenta.
Maibe antes too tinan 2027, Eis jornalista nee katak, sei aprezenta kondisaun infraestrutura transmiter RTTL,EP nian ba Prezidente Autoridade Munisipiu Manufahi atu apoiu kondisaun balu, tanba preparasaun ba dezentralizasaun poder lokal kondisaun ba Komunikasaun Sosial mos importante atu hadia.
“Se Munisipiu Manufahi too tempu 2027 simu duni dezentralizasaun poder lokal, kondisaun ida mak informasaun transmisaun husi radio no televizaun iha nivel Munisipiu nian bele ajuda preparativu Manufahi nian, kona-ba rekursu umanu RTTL mos iha nia planu iha tempu mai bele kria biro ida, atu hanoin too neeba presiza prepara kondisoens fasilidade,” Expidito espresa.
Entretantu durante SEKomS hamutuk ho Primeiru Ministru vizita Munisipiu sira iha territoriu nasional, observa mos kondisaun transmiter sira planu atu halo reabilitasaun neebe sei aposta iha Orsamentu Jeral Estadu (OJE) 2027.
(tom)
