BAUKAU, STLTIMORLESTE.com – Inisiu fulan Novembru tinan 2024, Komando Polisia Nasional Timor Leste (PNTL) Munisipiu Baukau, rejistu asidente 3 inklui insidente 2.
Deklarasaun nee hatoo husi Komadante Komando Polisia Munisipiu Baukau, Superintendente Xefe Polisia, Antonio Maria de Sa ba jornalista sira, iha Vila Nova, Baukau, Segunda (04/11/2024).
“Hahu husi dia 01-03 ita rejista asidente 2 iha Seiçal, 1 iha Kairavela, insidente ita nia joven nain 2 ba tasi nain 1 mate,” Superintendente Xefe Polisia, Antonio.
Komandante Munisipiu nee esplika, asidente iha Suku Seiçal, Postu Administrativu Baukau Vila no area Kairavela Postu Vemasi envolve entre motor ho motor, tanba halai ho velosidade, maibe la rezulta ema ruma lakon vida no kanek grave husi asidente refere.
Nia fundamenta, enkuantu insidente neebe komando Polisia Munisipiu Baukau rejistu mak hanesan, iha loron 03 Novembru parte tuku 05:00 lokraik, iha sidadaun nain 2 ba buka ikan iha tasi area Postu Vemasi nian, maibe ho korente tasi neebe makaas konsege hamout sidadaun nain ida ho inisial FDCDF tinan 20 lakon vida.
“Kazu ida mout nee hodi kalan ita nia ekipa kompostu husi Komando Polisia Baukau, ho ita nia Bombeiru ho ekipa neebe involve iha ekipa salvasaun foin dadersan mak hetan entrega ona ba Familia,” nia sublina.
Aleinde nee mos de Sa relata, insidente seluk mak ema deskonhesidu tenta tuda bis ida ho sapa matrikula A.13-332 neebe diresaun husi Dili-Baukau iha area Suku Bukoli, Postu Baukau Vila, rezulta janela parte liman karuk rahun inklui sidadaun feto ida ho identidade Nedia da Cruz tinan 31 hetan kanek iha parte ulun, tanba kona husi vidru rahun.
Sidadaun feto neebe kanek husi asaun nee, kundotor lori kedas ba Postu Saude Bukoli hodi halo tratamentu mediku ho emidiata husi pesoal saude sira.
(EST/2)
