DILI, STLTIMORLESTE.com – Insendiu neebe akontese iha Aldeia Duhoho, Suku Haupu, Postu Administrativu Lete Foho, Munisipiu Ermera, rezulta ema nain 4 lakon vida.
Insendiu nee akontese iha loron Sesta (26/09/2025).
No ema neebe lakon vida mak hanesan feen neebe ho kondisaun gravida hela, laen ho oan rasik ida, inklui mos ho vizinhu sira nia oan ida.
“Sira nain haat mak mate, ferik oan ho kondisaun gravida, no nain tolu lori ba iha hospital la konsege salva,” dehan Xefe Suku Haupu, Euzebio Alcino Maia ba jornalista STL, Domingu (27/09/2025).
Tuir nia, inan neebe mate iha fatin ho kondisaun gravida, no akontese nee kauza husi sunu lilin no gazolina mos tau hela iha uma laran, lilin neebe sunu halo manas makaas to ikus mai hodi gazolina rebenta.
Aleinde nee, tuir informasaun neebe asesu husi fontes konfirmadu katak, momentu neeba iha hela fatin Lokolai neebe pertense ba iha Aldeia Duhoho, familia kiik nee sunu lilin iha uma laran maibe lilin neebe sira sunu nia manas kona iha Gazolina neebe tau mos iha uma laran.
Ho manas neebe husi lilin kona gazolin neebe tau iha uma laran, ikus mai rezulta gazolina rebenta, ahi mos lakan no matebian hanesan feen ho kondisaun gravida mate kedan iha fatin, laen no oan feto ida inklui vizinhu sira nia oan ida evakua husi Postu Administrativu Lete Foho mai too iha HNGV, maibe ikus mai la konsege salva.
Fontes nee afirma, oras nee daudaun iha nain ida mak sei halo hela tratamentu iha HNGV.
Tuir observasaun jornalista STL iha terenu haree katak , mate isin nain tolu neebe mate iha HNGV, kareta tolu mak transporta no oras nee daudaun too ona iha rezidensia neebe lokaliza iha Lokolai, Aldeia Duhoho, Suku Haupu, hodi tau hamutuk ho matebian neebe kondisaun gravida hela.
Inan neebe kondisaun gravida ho naran Frangina de Araujo Gomes, moris iha 07/11/1996, laen Alberto Soares Paiva, moris iha 15/09/1992 no oan feto Zara de Araujo Soares Paiva, moris iha 29/05/2016 no vizinhu nia oan Zenivio Nelio Dos Santos.
Jornalista: Terezinha De Deus
Editora: Carme Ximenes
