OESILO, STLTIMORLESTE.com – Insidente neebe akontese iha area zona livre Kiubola, fronteira Faotbasin Aldeia Kiubiselo, Suku Bobometo Postu Administrativu Oesilo, Rejiaun Administrativa espesial Oecusse Ambeno (RAEOA) ho Distritu Timor Tengah Utara (TTU) Suku Inbate, Postu Administrativu Bikomi Nilulat, Nusa Tenggara Timur (NTT) Indonezia, ida nee kompetensia nivel Altu husi nasaun Republika Demokratika Timor Leste (RDTL) ho Nasaun Indonezia maka sei rezolve tanba problema neebe akontese iha, haree direitamente husi ekipa konjuntu Ministeriu Negosiu no Estranjeiru TL ho RI, sira maka hasoru insidente nee iha linha fronteira bainhira tau estakamentu linha livre husi nasaun rua iha fronteira.
Kestaun nee hatoo husi Xefe Suku Bobometo, Jose Labi Caet iha fronteira Unidade Polisia Fronteira (UPF) Faotbasin katak, nia rezeita atu hatoo informasaun ba publiku tanba akontesementu nee nia mos la hatene no problema nee laos provoka husi ninia povu iha Suku Bobometo, realidade ninia povu iha fronteira nee moris hakmatek no la iha ema ida maka sai vitima ba insidente nee.
“Problema neebe akontese iha fronteira Kiubola neeba, autoridade husi MNEK Indonezia no TL mak hatene, tanba sira maka ohin iha linha fronteira, motivu husi akontesementu nee mos lahatene, provokasaun nee mai husi neebe, husik seguransa nasaun rua TNI, UPF no Ekipa MNEK nasaun RI ho TL maka rezolve tanba sira mak ohin iha terenu hodi harii estakementu zona livre iha fronteira, hau nia komunidade ohin la iha neeba, so ekipa neebe cor estakamentu fronteira ba zona livre akompanha husi seguransa rai rua no MNEK mak iha neeba, sira maka hatene,” dehan rezeita fo informasaun husi Xefe Suku Bobometo tanba kestaun nee laos ninia kompetensia maibe nasaun ninia kompetensia.
Nia rekonhese katak loos duni, mosu insidente entre komunidade Inbate ho parte MNEK ho Seguransa TL-Indonezia, iha area Frontera Faotbasin TL ho Inbate-Indonezia, maibe situasaun normaliza fali ona tanba serbisu masimu husi Seguransa TNI ho UPF iha area fronteira.
“Loos duni, akontese insidente iha area fronteira nasaun rua iha Suku Bobometo ho Inbate, maibe hau lahatene kronolojia akontesimentu nee tanba hau iha komunidade nia leet, neebe buat nee akontese ona, husik autoridade seguransa rai rua maka sei rezolve hamutuk ho Ekipa MNEK nasaun RI-TL, ida nee sira nia kompetensia, hau hanesan Xefe Suku apela ba hau nia komunidade atu hadook aan husi provokasaun nee, karik iha investigasaun maka hau nia komunidade involve, ida nee nia maka sei assume ninia aktu inmoral nee hasoru ekipa MNEK ho Seguransa nasaun rua nian, maibe atu dehan deit, katak insidente nee laos mai husi hau nia komunidade,” dehan nia.
Xefe Suku Usi Taqueno, Francisco Elu mos rezeita atu komentariu tanba iha linha fronteira Faotbasin ho Suku Usi Takeno no Bobomato, mesak familia deit, nunka kria problema tanba komunidade rua iha fronteira sempre vizita ba malu, susar ruma kona familia iha fronteira sempre bolu malu nuudar maun alin maske diferente nasaun hodi rezolve, hanesan lia mate, lia moris, sempre vizita ba malu nuudar maun alin iha fronteira.
Tuir observasaun STL iha Fronteira Faotbasin, komunidade iha Suku Bobometo, Usi Taqueno kontinua halao sira nia atividades hanesan bai-bain no respeitu autoridade Seguransa nasaun RI-TL nuudar luta nasaun nian iha fronteira, maioria povu Oesilo komentariu katak kestaun fronteira nasaun, ida nee kompetensia nasaun nian hodi rezolve, nuudar povu kiik hatene maka buka moris hodi hamoris ekonomia familia, maske mosu video badak neebe posting husi Media Pos Kupang neebe viral no husi SMNews kontinua posting tutan video nee iha sira nia facebook iha TL maibe komunidade sira iha Oecusse neebe moris iha linha fronteira kontinua vizita ba malu hodi hametin unidade entre marga ou fam iha fronteira, balun partisipa iha serimonia inaugurasaun uma lisan iha fronteira no iha area odamatan fronteira kontinua loke hodi halo movimentu ema ho sasan tama sai husi fronteira lao normal.
(jos)
