DILI, STLTIMORLESTE.com – Komando Polísia Nasional Timor Leste (PNTL) Rejiaun Administrativa Espesial Oekusi-Ambeno (RAEOA) halao ona identifikasaun ba kazu insidente ida neebe akontese iha Naktuka, iha loron 28 fulan Abril tinan 2025, iha neebe sidadaun Naktuka ida ho identidade Cosmos Oli deklara katak, nia hetan agresaun fíziku husi membru Unidade Patrulhamentu Fronteira (UPF).
Nia dehan, tuir relatoriu neebe mak mai husi Komando PNTL RAEOA katak, iha loron 28 fulan Abril tinan 2025, investigasaun Munisipiu Oekusi simu relatoriu no informasaun balun husi UPF neebe informa katak akontese insidente balu iha parte Naktuka nian.
“Ita nia sidadaun ida naran Cosmo Oli koalia iha Media Sosial katak nia hetan agresaun fíziku husi membru UPF sira, hafoin halo verifikasaun primeiru hakarak informa ba públiku katak sidadaun refere, Servisu Informasaun Polísia (SIP) husi UPF halo ona tracking kleur ona ba nia, konsidera nia hanesan autor ba propaganda no provokatoriu, nia ba parte sorin (Indonezia) lori informasaun mai iha nee (Timor Leste) no lori informasaun husi nee (Timor Leste) ba fali parte sorin (Indonezia),” hatete Porta Voz Komando PNTL, Superintendente Polísia João Belo liu husi konferensia imprensa, Sesta (02/05/2025).
Nia esplika, wainhira UPF halo identifikasaun ba sidadaun refere, liu tiha minutu balun deit bandeira nasaun vizinhu nian nakonu iha Naktuka. Husi nee PNTL iha kompetensia tomak tuir artigu 53 Kódigu Prosesu Penal, halo identifikasaun ba nia, tanba saida mak nia halo movimentu iha oras neeba mai no tanba saida mak akontese hafoin nia tama mai, iha mós movimentu boot ida husi sorin tama mai iha nee.
“Husi deklarasaun sira neebe mak ita foti husi nia, laiha indikasaun ka husi nia deklarasaun rasik la informa ba investigador sira katak nia hetan torturasaun, entaun sidadaun nee mos ita konsidera nia bosok tanba nee ita aplika mós artigu balun kona-ba lia bosok neebe nia públika iha Media Sosial, tanba nee ita liga ba Soberania Estadu, ita labele halimar fali ho Soberania Estadu, sidadaun ida labele halo provokasaun tun sae atu estraga Estabilidade Nasaun nian, tanba nee ita halo identifikasaun hafoin ita aprezenta ba Ministeriu Públiku (MP) hodi prosesa nia,” nia deklara.
Entretantu iha kriminal nee hatutan tan katak hafoin halo identifikasaun ba nia, la halo asaun detein ba sidadaun refere tanba tuir Artigu 53 Kódigu Prosesu Penal nian, Polísia iha dever atu halo identifikasaun ba sidadaun hotu neebe deskonfia halo auto krimi ruma.
(jen)
