DILI, STLTIMORLESTE.com – Inspetor sira halo identifikasaun ba eskola neebe sei menus meza no kadeira ba estudantes sira iha Munisipiu Manatuto.
Liafuan nee afirma husi Direitur Servisu Edukasaun Munisipiu Manatuto, Patricio da Cruz Quintao ba STL liu husi telefone, Tersa (29/04/2025).
“Konaba meza no kadeira iha eskola sira Munisipiu Manatuto, agora dadaun ita halo identifikasaun foun, tanba ita nian eskola balun sei menus hela meza no kadeira. Ho ida nee agora ita sei haruka inspetor sira nee halo identifikasaun ba eskola sira, atu nunee sira bele prepara dadus ba ita nian eskola hirak neebe sei menus meza no kadeira,” nia dehan.
Nia afirma, ninia problema mak nee bainhira Direitur eskola sira mak fo dadus, nee dala ruma meza no kadeira seidauk bele uza, maibe sira dehan at hotu ona, nee mak foin dadaun nee haruka deit inspetor sira mak atu identifika, para halo proposta.
Nia hatutan, nee duni inspetor sira hahu halao identifikasaun ba eskola neebe menus meza no kadeira, atu nunee bele hatene lolos eskola iha Manatuto nee hira mak sei menus meza no kadeira ba estudantes sira.
Iha fatin seluk Direitur Servisu Edukasaun Munisipiu Ainaro,Patricio da Costa Magno hatete, eskola neebe sei menus meza no kadeira nee hahu husi nibel pre eskolar too iha nibel ensinu baziku. Lista husi ministeriu haruka ona ba sira,tanva nee hein deit husi ME haruka fasilidade sira nee ba iha Munisipiu.
Nunee mos Direitur Servisu Edukasaun Munisipiu Liquica,Julio da Silva katak, relasiona ho fasilidade no sala aprendizajen neebe sei menus, nudar Direitur Edukasaun Munisipal halo ona pedidu ba ME iha fulan Marsu tinan nee, maibe too agora meza no kadeira seidauk too mai iha eskola.
(jac)
