DILI, STLTIMORLESTE.com – Prezidente Asosiasaun Majislatura Judisial Timor Leste (AMJTL), Antoninho Gonsalves hatete, durante nee nia haree Inspetor Internasional neebe mai halao inspesaun ba Juiz sira, halao servisu tuir lei.
“Hau hanesan Juiz Sekretariu iha neeba, hau komprende diak saida maka serbisu Inspetor nian, no serbisu Inspetor nian iha Estatutu Majistradu Judisial koalia, iha regulamentu rasik mos koalia, tanba nee se ita dehan sira serbisu la imparsial nee lalos, “dehan Antoninho ba STL, iha Kaikoli, Dili, Segunda (25/08/2025).
Nia dehan, haree relatoriu husi Inspetor sira kona ba Juiz sira nia servisu bazeia ba faktus, kuandu iha prosesu ruma hasoru Juiz sira Inspetor tun ba iha terenu kuandu prosesu tama Inspetor to ba iha Tribunal Primera Instansia hodi rona testamuna, rona Juiz nee rasik hodi halo konkluzaun.
Maibe iha relatoriu nee Inspetor sita artigu kompletu, no servisu tuir nia matenek no kapasidade neebe iha. Kona ba Juiz sira atu tama kareira, diak liu Juiz sira husu ba sira nia an rasik, bele sae ona kareira bele ka lae, Juiz sira tenke senseriu.
Nia hatutan, Inspetor sira halao servisu tuir lei deit, tanba sira halo juramentu nomeia ba Inspetor automatikamente integra ona hanesan Juiz Timor oan, halo servisu tuir lei, se publiku ruma hare servisu la tuir lei tenke ba hato iha KSMJ hodi halo prosesu.
Nunee tuir regra kuandu keixa ruma tama iha KSMJTL, sei konvoka plenariu no Inspetor maka sei hare, maibe nia impedidu, sei nomeia fali Juiz ida ka inspetor seluk hodi hare. Tanba nee la iha faktus konaba inspetor sira nia aktu neebe dehan lalaos, se dehan Inspetor halo inspesaun lalos hato ba iha Konselhu.
Iha fatin ketak, Akademiku UNTL, Sebastiao dos Santos dehan, Inspetor nia servisu importante tebes, tanba nee tenke halao servisu ho imparsial.
“Importante sira tenke halao servisu ho imparsial, atu desizaun neebe sira foti liu husi inspesaun nee, bele tuir ho aktu sira neebe mosu,” dehan nia.
Antes nee, Kordenadora Grupu Trabalhu Reforma Sektor Justisa, Lucia Lobato hatete, Inspetor sira la halo inspesaun ba Juiz sira hotu, maibe halo deit ba Juiz balu.
“Inspetor sira la halo inspesaun ba Juiz sira hotu, hili deit hakarak halo ba balu halo tiha no balu la halo, deskriminasaun mosu mai rasik husi Juiz sira, Tribunal maka fatin ida neebe halo diskriminasaun ba justisa,” dehan Lucia.
(ter)
