DILI, STLTIMORLESTE.com – Inspetor husi Edukasaun Munisipiu Likisa kada loron halo kontrolu ba atividades hotu neebe mak lao iha eskola, hahu husi Edukasaun Pre Eskolar, Ensinu Baziku, Sekundariu no Tekvo.
Tuir Diretor Servisu Edukasaun Munisipiu Likisa, Julio da Silva ba jornalista STL liu husi telefone, Kuarta nee (21/05/2025).
“Hau hanoin kona-ba prosesu ensinu aprendizajen ninia, tanba ita iha ekipa monitorizasaun ou ekipa observador sira, husi parte inspesaun, husi mentor lokal sira neebe mak apoiu hela ita nian eskola sira, liu-liu ba ensinu baziku nee ba mentor lokal, maibe ba inspetor eskolar nee sira hahu husi pre eskolar too ba sekundariu no tekvo, nee sira halo kontrola hotu. Kualker programa neebe mak hodi diresaun nee, sira sempre akompanha hodi haree ninia prosesu sira ezekusaun sira halo tuir ou lae,” nia esplika.
Julio hatutan, inspetor sira halo kontrolu ba ensinu aprendizajen no iha atividades lubuk ida neebe mak sira halo kontrolu, hanesan ezekusaun orsamentu sira, merenda eskolar, konsesoins eskolar, programa nian neebe halao iha eskola sira nee presiza tau matan ba atividades hotu neebe ohin mensiona.
“Ami nian inspetor sira nee halo kontrolu ba eskola sira nee loron-loron, sira halo rotativa ba eskola, hanesan ohin planu ba eskola ida no aban ba eskola seluk, nee bolu dehan atividades rutina ba inspetor ninia,” katak nia.
Iha parte seluk, Diretor Servisu Edukasaun Munisipiu Manatuto, Patricio da Cruz Quintao hatete, sira iha ekipa tekniku ne’ebe sempre foti dadus ba iha eskola sira neebe mak lokaliza iha Munisipiu Manatuto, oinsa haree mos ba iha prosesu ensinu aprendizajen neebe mak lao iha eskola sira.
“Ami iha ekipa tekniku ne’ebe sempre foti dadus ba iha eskola sira neebe mak lokaliza iha Munisipiu Manatuto, oinsa haree mos ba iha prosesu ensinu aprendizajen neebe mak lao iha eskola sira,” dehan nia.
(eme)
