DILI, STLTIMORLESTE.com – Inspetores Nivel Edukasaun Pre Eskolar husi eskola Munisipiu Vikeke seidauk iha transporte hodi uza ba monitoring iha eskola sira.
Lia hirak nee hatoo husi Diretor Servisu Edukasaun Munisipiu Vikeke, Julio Sacadura ba STL liu husi telefone, Sesta nee (09/01/2026).
“Ita nian inspetores sira hasoru dezafius, primeiru kona-ba iklima, segundu estrada, terseiru mak ita nian profesores la pontualidade. Total inspetores nain 9. Pre eskolar 2 PSS. Ensinu Baziku 6 PSS. Ensinu Sekundariu Geral/ESTV : 1 PSS. Kona-ba taransporte so inspetores pre-eskolar mak seidauk iha,” dehan nia.
Julio dehan, inspetores sira nee halo monitoring ba eskola sira, tantu monitoring ba ensinu aprendizajen, merenda eskolar no atividades seluk neebe mak lao iha eskola sira neebe mak lokaliza iha Munisipiu Vikeke.
Nunee mos Direitor Servisu Edukasaun Munisipiu Likisa, Julio da Silva dehan, kona-ba difikuldade inspetores sira nian ba monitoring nee superintendente mak hatene, tanba ninia parte labele fo komentariu ba asuntu ida nee, tanba ida nee parte inspesaun jeral mak hatene, nee duni labele fo komentariu ba asuntu ida nee.
“Kona-ba difikuldade inspetores sira nian ba monitoring nee superintendente mak hatene, tanba ninia parte labele fo komentariu ba asuntu Ida nee, tanba ida nee parte inspesaun jeral mak hatene, nee duni labele fo komentariu ba asuntu ida nee,” nia esplika.
Reportajen: Jacinta Sequeira
