DILI, STLTIMORLESTE.com – Inspetor nivel ensinu tekniku vokasional no sekundariu jeral iha Munisipiu Ainaro presiza transporte, tanba too agora seidauk iha transporte neebe uza halo monitoring ba eskola sira.
Haktuir Diretor Edukasaun Munisipiu Ainaro, Patricio da Costa Magno ba jornalista STL liu husi telefone, Kuarta nee (14/01/2026).
“Inspetor ensinu sekundariu jeral no ensinu tekniku vokasional ninia mak seidauk iha, maibe ensinu baziku ninia nee inspetor eskolar iha hotu ona, ami nian inspetor ba tekvo no sekundariu nee nain ida deit, sira presiza transporte para bele halo monitoring ba ita nian eskola sira, tanba atividades hotu neebe lao iha eskola nee ita nian inspetor sira mak ba halo monitoring,” dehan nia.
Nunee mos Diretor Servisu Edukasaun Munisipiu Vikeke, Julio Sacadura, dehan, inspetores sira nee halo monitoring ba eskola sira, tantu monitoring ba ensinu aprendizajen, merenda eskolar no atividades seluk neebe mak lao iha eskola sira neebe mak lokaliza iha Munisipiu Vikeke.
“Ita nian inspetores sira hasoru dezafius, primeiru konaba Iklima, segundu estrada, terseiru mak ita nian profesores la pontualidade. Total inspetores nain 9. Pre eskolar 2 PSS. Ensinu Basico 6 PSS. Ensinu Sekundariu Geral/ESTV : 1 PSS,” dehan nia.
(jac)
