DILI, STLTIMORLESTE.com – Total Inspetores iha Edukasaun Munisipiu Dili hamutuk 12, nee sufisiente ona bele Kobre eskola sira.
Informa Superintendente Edukasaun Munisipiu Dili, Cesarina Correia Guterres ba jornalista STL iha nia knaar fatin Vila Verde, Tersa nee (22/07/2025).
“Ami nian inspetor no inspetora iha Servisu Edukasaun Munisipiu Dili total hamutuk 12 pesoas no kolaka ba eskola sira hamutuk 232. Husi total eskola iha leten mai husi Eskola ESTV 10, ESJ 36, EBC 46, EBF 80 no EPE 60. Kada inspetor no inspetora masimu kontrola 21 eskola, tanba nee ami nian Inspetores sanolu resin nee sufisiente ona atu bele kobre ami nian eskola sira iha Munisipiu Dili,” dehan nia.
Tuir superintendente nee katak, ho inspetores 12 nee bele halo kontrolu ba eskola hirak neebe mak lokaliza iha Munisipiu Dili, tanba nain 12 nee sufisiente ona atu kontrola eskola hahu husi Nivel Edukasaun Pre-eskolar, Ensinu Baziku, Filial, tekno no Nivel Ensinu Sekundariu sira iha Munisipiu Dili.
Nunee mos SEM Ainaro, Patricio da Costa Magno hatete, eskola iha area remotas nee ho distansia neebe mak dook malu, entaun inspetores neebe mak iha, sira labele Kobre hotu eskola sira nee, tanba hanesan ohin dehan eskola nee dook malu, tanba nee ba oin presiza aumenta tan Inspetores.
“Ita nian eskola iha area remotas nee ho distansia neebe mak dook malu, entaun inspetores neebe mak iha, sira labele Kobre hotu eskola sira nee, tanba hanesan ohin dehan eskola nee doik malu, tanba nee ba oin presiza aumenta tan inspetores,” nia komenta.
Entretantu Diretor SEM Likisa, Julio da Silva dehan, daudaun nee Inspetores eskolar iha Munisipiu Likisa hamutuk nain 10, maibe atu kobre ba eskola sira diak liu tan mak ba oin presiza aumenta ida ou rua.
“Ita nian Inspetores eskolar iha Munisipiu Likisa agora daudaun nain 10, nee sira kobre hotu eskola, ema ida bele kobre agrupamentu ida no rua, maibe liu-liu ba Ensinu Sekundariu nee tenke iha para bele haree liu ba iha area espesífiku sira nee. Nain 10 nee ba Pre-eskolar nain 3, Sekundariu nain 1 no Ensinu Baziku nain 6,” nia dehan.
(jac)
