DILI, STLTIMORLESTE.com – Durante nee inspetores sira nafatin halo monitorizasaun ba atividades hotu neebe mak lao iha eskola sira.
Lia hirak nee hatoo husi Diretor Servisu Edukasaun Munisipiu Manatuto, Patricio da Cruz Quintao ba jornalista STL liu husi telefone, Tersa nee (23/12/2025).
“Durante nee ita nian inspetores sira nafatin halo monitoring ba ita nian atividades neebe lao iha eskola sira, karik iha eskola balun neebe mosu asuntu importante ruma, nee inspetores sira servisu hamutuk. Durante nee monitoring ba atividades sira hanesan implementasaun merenda eskolar, prosesu aprendizajen no atividades hotu neebe mak lao iha ita nian eskola sira,” dehan nia.
Patricio hatutan, eskola sira balun iha area remotas distansia dook malu, maibe inspetores sira nian papel iha terenu importante tebes hodi bele kontrolu atividades neebe mak lao iha eskola sira.
“Ita nian inspetores sira nee idak-idak nian, balun ba pre eskolar, sekundariu jeral no ensinu tekniku vokasional, oinsa sira monitoring ba ita nian nivel eskola neebe mak ohin hau mensiona, nee kobre hotu,” katak nia.
Jornalista: Jacinta Sequeira
Editor: Xisto Mendonça
