DILI, STLTIMORLESTE.com – Institutu Nasional Saude Publika Timor Leste, Institutu Publiku (INSPTL, I.P) asina akordu kooperasaun tekniku ho Fundasaun Alola ba area kapasitasaun no formasaun ba pesoal saude sira iha munisípiu sia (9).
“Ami hamutuk ho Fundasaun Alola selebra ami nia estensaun akordu servisu hamutuk atu ofisializa servisu neebe INSPTL ho fundasaun Alola ba oin, liu-liu fo formasaun ba pesoal saude sira iha munisípiu sia hanesan Dili, Atauro, Aileu, Likisa, Lautem, Vikeke, Ainaro no Manufahi,” hatete Prezidente INSPTL, Merita Monteiro ba jornalista sira iha INSPTL Comoro, Tersa nee (22/07/2025).
Nia dehan, ida nee laos akordu foun, maibe estensaun deit, tanba servisu nee antes halao ona hamutuk tinan barak.
”Durante nee ami haree hamutuk ba iha area kapasitasaun formasaun ba pesoal saude sira iha neebe mak ami halo formasaun atu hasae sira nia konhesimentu ba iha area saude inan no oan no adolosente. Maibe iha tinan ida nee akordu tekniku neebe ami asina hamutuk ho periodu tinan tolu ba oin maibe sei aumenta tan pontu seluk ba iha área peskiza nian,” nia haktuir.
Nia informa, ho hanoin katak, rezultadu implementasaun programa sira neebe mak durante halo nee seidauk peskiza no defini lo-loos iha area saida mak hakarak halo, maibe iha ona hanoin balun neebe mak hakarak peskiza atu avalia fila fali implementasaun sira mak INSPTL halo ona liu-liu ba peskiza implementsaun sira iha impkatu iha ga lae.
Iha fatin hanesan, Diretora Ezekutiva Fundasaun Alola, Maria Imaculada Guterres deklara, asina akordu ho objetivu atu halo kolaborasaun tekniku hamutuk ho INSPTL atu bele apoiu implementasaun programa neebe mak Fundasaun Alola iha liu husi programa inan no oan.
”Entaun akordu neebe mak ohin asina nee atu haree liu ba nia implementasaun programa ba liu formasaun pesoal saude sira iha área sira hanesan programa inan no oan, saude labarik nian liu-liu ba nutrisaun, saude reprodutiva adulisente no mos ba prevensaun moras kankru,” nia deklara.
Nia afirma, akordu neebe mak asina nee dura, tinan nee no tinan tolu ba oin, atu enkaixa tan departamentu peskiza INSPTL nian atu apoiu mós programa sira neebe Fundasaun Alola halao durante mimplementa liu- liu iha relasaun ho peskiza neebe Fundasaun Alola planu atu ba kankru feto hanesan kankru susun no kankru serviks.
(jen)
