BAUKAU, STLTIMORLESTE.com – Institutu Nasional Seguransa Sosial (INSS) Munisipiu Baukau rejistu benefisiariu idozu no invalides foun hamutuk nain 125 ba pensaun sosial segundu faze nian no taka konta bankaria husi benefisiariu hamutuk nain 339.
“Ita nia benefisiariu ba pagamentu segundu faze nian benefisiariu foun iha Baukau kuaze 125, maibe foin lalais ita mos iha lista mate neebe daudaun ita prosesa 339 neebe nia prosesu los ona, konta bankaria taka ona,” informa Koordenador INSS Munisipiu Baukau, Gil Ximenes Gusmão ba jornalista STL iha nia knaar fatin Vila Nova, Sesta (20/06/2025).
Nia esplika, benefisiariu nain 339 kompostu husi idozu no invalides neebe balun tinan hirak ba kotuk fila ona ba Aman Maromak nian kadunan Santo (Mate), maibe parte familia la informa no kada periodu osan neebe preve kontinua tama iha konta bankaria, nunee INSS liu husi kooperasaun servisu halo identifikasaun konsege taka konta bankaria husi benefisiariu refere.
Nia sublina, husi konta bankaria 339 neebe taka obrigatoriu orsamentu neebe aloka hamutuk rihun US$ 148 fila ona ba kofre estadu, hafoin remata pagamentu faze dahaat tinan 2024 no faze primeiru tinan nee.
“Durante nee familia la mai deklara, entaun orsamentu tama dezde tinan rua tolu ba kotuk sei iha hela konta, entaun ita print sira nia estrato do banco, ita haree osan iha laran, entaun ita kalkula tuir destina no la destina mak ita haruka fila ba kofre estadu,” Gil fundamenta.
Koordenador INSS Munisipiu Baukau nee argumentu, durante akontese orsamentu neebe Governu aloka iha deit konta bankaria hafoin benefisiariu sira neebe mate ona, tanba kauza husi programa anterior ho razaun benefisiariu sei iha direitu ba tinan ida, nunee familia benefisiariu rai dokumentus liu tinan ida hafoin prosesa hodi simu direitu pensaun sosial, maibe daudaun la hanesan nee ona, tanba prejudika ba Orsamentu Jeral Estadu.
Tanba iha dekretu lei 53/2022 artigu 15 deklara katak, benefisiariu neebe mate ona sei iha direitu pensaun sosial too fulan rohan husi fulan neebe benefisiariu mate, enkuantu fulan tuir mai laiha ona direitu atu atribui ba familia benefisiariu.
“Entaun familia benefisiariu lori dokumentus liu husi autoridade lokal deklarasaun obito mai ita sura bazeia ba lei nee mak entrega direitu nee ba familia,” Gil akresenta.
Aleinde nee mos nia informa, ba lista pagamentu faze segundu tinan nee benefisiariu hamutuk 15.135 kompostu idozu 13.507 no invalides 1.628 neebe tuir planu atribui direitu pensaun sosial sei hahu iha loron 27 Junhu nee no remata iha loron 05 Julhu 2025.
Tuir orariu husi Banku Nasional Komersiu Timor Leste (BNCTL – sigla português) loron 27 Junhu sei hahu pagamentu ba benefisiariu sira husi Postu Administrativu Kelikai, Matebian no Kelikai Antigu, hafoin kontinua ba Postu Administrativu seluk too remata iha Postu Baukau Vila loron 05 Julhu.
Entretantu orsamentu neebe Governu aloka liu husi Ministeriu Solidariedade Sosial no Inkluzaun preve ba idozu no invalides sira iha Baukau faze daruak tinan nee hamutuk US$ 3,028,780.00.
(tom)
