BAUKAU, STLTIMORLESTE.com – Institutu Nasional Seguransa Sosial (INSS) sujere benefisiariu neebe kondisaun moras lalika too iha fatin pagamentu, maibe hein deit iha uma, tanba ekipa sei too hodi atribui direitu pensaun sosial neebe Governu liu husi ministeriu aloka ona.
Koordenador Institutu Nasional Seguransa Sosial, Munisipiu Baukau, Gil Ximenes Gusmão esplika, tuir akordu neebe INSS no Banku Nasional Komersiu Timor Leste (BNCTL – sigla português) selebra iha loron 13 Marsu 2025, avizu ona iha publiku katak, benefisiariu neebe kondisaun moras lao labele no invalides ema ho kondisaun fiziku (lao labele) la permite atu marka prezensa iha fatin pagamentu determinadu hodi simu direitu pensaun sosial.
Nunee mos Governu liu husi Ministeriu Solidariedade Sosial no Inkluzaun (MSSI) deklara ona no husu familia benefisiariu atu konsola no labele obriga benefisiariu neebe kondisaun moras marka prezensa iha fatin pagamentu hodi hetan direitu pensaun sosial.
Maibe hein deit iha idak-idak nia rezidensia, tanba INSS no BNCTL sei kria orariu pagamentu foun hodi atribui direitu pensaun sosial iha kada benefisiariu nia rezidensia bainhira pagamentu normal remata.
“Lori benefisiaria ho kondisaun moras ba fatin pagamentu nee risku, bele akontese buat neebe ita la espera, tanba nee husu familia sira labele lori benefisiariu neebe moras ba fatin pagamentu ho meius saida deit mos labele, husik INSS ho BNCTL sei halo pagamentu,” hateten Gil ba STL iha knaar fatin, Vila Nova, Kinta (27/03/2025).
Koordenador INSS Munisipiu Baukau nee sublina, la autoriza familia lori benefisiariu neebe ho kondisaun moras ba too fatin pagamentu, tanba hakarak antisipa kondisaun seluk neebe la espera atu akontese ba benefisiariu neebe kondisaun moras too iha fatin pagamentu.
Nia fundamenta, nunee mos la autoriza familia obriga ka halo tuir benefisiariu nia hakarak hodi tula ho transporte publiku no privadu ba fatin pagamentu, maibe haree benefisiariu ou benefisiaria kondisaun moras, parte familia tenke halo aprosimasaun ba benefisiariu no koordena ho INSS no BNCTL sei too rezidensia hodi atribui direitu pensaun sosial.
“Husu ba Autoridade Lokal sira, benefisiariu pensaun sosial invalides no idozu atu mantein iha hela fatin depois mak ita halo atendimentu ba sira, husu labele mobiliza ema sira neebe moras ba fatin pagamentu,” Gil rekomenda.
Koordenador INSS Munisipiu Baukau nee husu Autoridade Suku sira, avizu ba komunidade sira hodi la permite benefisiariu kondisaun moras familia obriga hodi too fatin pagamentu, maibe INSS ho BNCTL sei kria orariu pagamentu foun hodi atribui direitu pensaun sosial ba benefisiariu neebe kondisaun moras iha nia rezidensia, bainhira pagamentu normal remata.
Xefe Suku Samalari, Rui Sertorio Siquera Magno hatete, Autoridade Suku Samalari avizu ona ba benefisiariu sira neebe kondisaun moras no lao labele hodi la marka prezensa iha fatin pagamentu.
“Avizu nee uluk kedas, ami mos rejistu ona benefisiariu ida neebe la hatene nia naran ami hatama ona iha INSS baibain halo pagamentu iha uma,” hateten Rui.
Xefe Suku nee relata, benefisiariu ou benefisiaria ba direitu pensaun sosial neebe lao la hatene husi kondisaun fiziku no kestaun saude, neebe suku rejistu benefisiariu hamutuk nain 33 neebe kada pagamentu ekipa INSS no BNCTL atribui direitu pensaun sosial direita ba benefisiariu sira iha nia rezidensia.
No Autoridade Suku mos fo ona avizu ba benefisiariu sira hotu, bainhira tempu pagamentu mak kondisaun moras, lalika obriga atu too fatin pagamentu, maibe hein deit iha uma hodi prosesu dokumentus liu husi suku hetan direitu pensaun sosial iha faze segundu, bainhira pagamentu normal remata.
Enkuantu benefisiaria no benefisiariu neebe daudaun kondisaun moras seidauk simu direitu pensaun sosial, INSS ho BNCTL sei atribui direitu pensaun sosial iha nia rezidensia no tuir planu sei akontese durante fulan Abril tinan nee.
Entretantu benefisiariu no benefisiaria neebe kategoria husi idozu no invalides neebe asesu pagamentu retroativu iha Munisipiu Baukau ba faze dahaat tinan 2024 no faze dahuluk tinan 2025 nian, neebe rejistu hamutuk 15.399 no hetan alokasaun orsamentu husi MSSI hamutuk US$ 5,897,858.00.
(tom)
