DILI, STLTIMORLESTE.com – Relasiona ho programa Governu nian atu instala Sentru Juvenil, oras nee daudaun husi Diresaun Nasional Servisu Prizional no Reinsersaun Sosial haruka ona pedidu ba iha Ministeriu Obras Publiku (MOP).
Tuir Diretor Nasional Servisu Prizional no Reinsersaun Sosial (DNSPRS), Delfio Soares alves katak, pedidu haruka ona ba, tanba nee hein deit rezultadu neebe sei mai.
“Centru Juvenil ita haruka ona pedidu ba iha Diresaun Jeral Habitasaun no Urbanizasaun Ministeriu Obras Publiku,” dehan Delfio ba jornalista STL iha Kaikoli, Segunda (01/09/2025).
Nia argumenta, haruka pedidu autorizasaun no verifikasaun no Termo Referensia ba Sentru Juvenil nian, no hein tempu ruma iha rezultadu mak sei prosesu kontinuasaun fali ba oin.
Iha fatin ketak, Jurista Jose Maria Guterres dehan, presiza instala sentru juvenil atu tau dadur sira neebe idade juvenil ketak.
“Too tempu ona atu instala sentru juvenil, tanba ohin loron seidauk iha fatin ida ketak hodi tau dadur juvenil sira, maibe iha deit mak prizaun tolu,” dehan nia.
Nia akresenta, dadur sira neebe idade juvenil presiza tau sira iha fatin neebe ketak, liu husi atividade sira neebe diak atu transforma sira nia hanoin, liu liu atu hadook sira labele pratika krimi.
Nka sublina, publiku barak sei kestiona kona-ba minoridade komete krimi barak liu, tanba nee too ona tempu atu halo mudansa, oinsa kria sentru juvenil ida, no iha atividade sira neebe espesifiku ba juvenil sira atu muda sira nia hanoin husi konflitu.
Aleinde nee Ministru Justisa, Sergio Hornai katak, kona-ba Sentru Juvenil tekniku sira sei haree hela, no mos kona-ba Prizaun Weberek tama ona iha Konselhu Administrasaun Fundu Infraestrutura (KAFI).
“Iha ekipa tekniku balu halao hela servisu, hanesan agora daudaun ita haree hela sentru reinsersaun sosial ka sentru Prizional neebe ita atu halo iha Weberek nian, tama ona iha Konsellu Administrasaun Fundu Infraestrutura nia servisu atu oinsa lao ba oin,” dehan MJ.
Nia esplika, ekipa tekniku sira halao hela servisu ba ida neeba, tanba nee husik ekipa tekniku halao lai sira nia servisu.
Nia afirma, Sentru Juvenil tuir planu sei harii iha Tibar, maibe agora sei iha hela prosesu nia laran.
Jornalista: Terezinha De Deus
Editor: Xisto Mendonça
