BAUKAU, STLTIMORLESTE.com – Instalasaun fiu eletrisidade ba bomba bee hodi fornese bee ba pasiente no pesoal saude sira iha Hospital Rejional Eduardo Ximenes (HoREX) iha Baukau daudaun nee avaria.
“Ami nia bee barak hela, soke ami nia instalasaun ahi neebe mak iha rai okos atu ba makina bomba bee nian nee mak problema, nee ami rezolve kuaze semana ida ona seidauk hetan solusaun diak,” hateten Diretor Ezekutivu HoREX Baukau, Claudino Ximenes ba jornalista STL iha nia knaar fatin HoREX Baukau, Kuarta (28/05/2025).
Nia esplika, avaria refere kuaze semana ida ona ekipa tekniku sira koko halo manutensaun, maibe la konsege rezolve, tanba fiu eletrisidade ba instalasaun kualidade hanesan laiha.
Preokupasaun nee parte HoREX relata ona pedidu ba Nasional atu Ministeriu responde no aloka fiu kualidade hodi tekniku sira re-instalasaun ba makina bomba bee, nunee bele fornese bee ba sala pasiente sira no pesoal saude sira diak liu tan.
“Agora fiu nee buka hela husi Ministeriu fo ona informasaun mai fiu iha ona, riin sira mos monta daudaun ona, bainhira fiu lori ona mai bele halo ona instalasaun monta ahi ba makina bomba bee nee, para apoiu bee mai iha Hospital laran,” Claudino Ximenes akresenta.
Diretor Ezekutivu nee katak, mezmu instalasaun fiu eletrisidade ba bomba bee durante nee avaria la fo impkatu, tanba parte Hospital buka meius alternativu makina sanio hodi foti bee husi tanki fornese bee ba sala pasiente no pesoal saude sira hodi utiliza tuir nesesidade.
Iha sorin seluk, familia pasiente Leonito Maria Da Silva konta, durante semana ida ona hein alin iha sala baixa HoREX Baukau, maibe bee garante utiliza ba nesesidade haris no seluk tan.
“Hau mai iha nee kuaze semana ida ona, maibe bee iha hariis fatin sala ami toba ba nee bee iha,” Leonito hakotu.
(tom)
