BAUKAU, STLTIMORLESTE.com – Instalasaun fiu eletrisidade iha Aldeia Waimanuboe, Suku Uailili, Postu Administrativu Baukau Vila, fiu barak dada husi ai-hun leten, neebe konsidera fo ameasa ba komunidade sira nia vida.
Tuir observasaun jornalista STL nian iha Aldeia Waimanuboe Suku Uailili, loron 26 Julhu nee nota katak, instalasaun fiu eletrisidade neebe iha Aldeia Waimanuboe ba uma komunidade sira barak dada husi ai-hun leten no fiu barak dada bobar malu.
Ai-hun sira neebe dada fiu eletrisidade husi leten ba uma komunidade sira nian mak hanesan as hun, nu’u hun, serenja, ai-teka, inklui aifunan hun kiik sira neebe komunidade sira kuda iha uma ninin.
Iha sorin seluk komunidade Aldeia Waimanuboe, Domingas Freitas hateten, iha semana liu ba akadiru hun ida tohar monu kona instalasaun fiu eletrisidade baixa tensaun, hodi fiu refere monu husi riin eletrisidade no daudaun latan iha rai kuaze semana ida ona, maibe parte EDTL Baukau la marka prezensa hodi halo manutensaun ruma.
“Hodi bainhira semana kotuk nee akadiru nee derepende monu tun hanehan fiu nee monu tun iha estrada nee. Nee ameasa ba ami, ami husu EDTL ami hadia fila fali, tanba ami besik iha nee, tauk mak derepende soke ami. Labarik kiik oan sira lao ba lao mai mak la hatene derepende duni malu mak sama dala ruma soke sira, neebe ami husu EDTL ami hadia fila fali,” hateten Domingas ba jornalista sira iha Waimanuboe, Sabadu (26/07/2025).
Nia sublina, fiu baixa tensaun refere iha semana kotuk liu ba monu, iha estrada klaran hodi impede movimentu transporte, nunee komunidade sira inisiativa dada ses fiu refere husi estrada klaran ba estrada ninin.
Fiu refere daudaun kontinua latan iha estrada ninin no tuir komunidade Domingas katak, nee perigozu ba komunidade sira liu liu labarik kiik sira la hatene bainhira halimar no derepende sama bele fo impaktu ba sira, tanba fiu refere latan iha estrada ninin besik liu uma barak.
Observasaun seluk husi STL nian nota husi fiu baixa tensaun neebe monu refere, dadaun latan tan iha kanalizasaun bee torneira ida besik liu estrada ninin.
Liga asuntu nee, STL tenta konfirma parte Eletrisidade Timor Leste Munisipiu Baukau, maibe seidauk hetan komentariu, tanba edifisiu taka.
(tom)
