DILI, STLTIMORLESTE.com – Instala Tribunal iha munisipiu haat (4), tuir planu neebe iha seman oin sei fatuk dahaluk hodi hahu konstrusaun.
Tuir Prezidente Tribunal Rekursu, Afonso Carmona katak, harii Tribunal iha munisipiu haat (4) dezenhu sira fahe hotu ona, hein deit atu halo lansamentu tau fatuk dahuluk nian.
“Instalasaun Tribunal haat (4) lao hela iha Baukau, Ermera, Vikeke no Maliana, ita entrega ona dezenhu, iha semana oin ita sei tau fatuk dahuluk,” dehan Carmona ba jornalista sira iha Kaikoli, Kinta (26/02/2026).
Nia hatutan, iha reuniaun mak foin deside atu hahu uluk husi munisipiu neebe. Tanba oras nee daudaun hahu ona prepara ofisial justisa no mos funsionariu sira atu banhira termina konstrusaun ba Tribunal sira nee, bele iha ona rekursu atu koloka ba iha fatin sira nee.
Iha fatin ketak, Akademiku UNTL, Sebastião dos Santos dehan, presiza duni instala Tribunal iha munisipiu sira atu lori justisa too ba iha baze.
“Importante duni instala Tribunal iha munisipiu sira, atu nunee lori justisa hakbesik ba iha komunidade sira, atu sira mos sente katak justisa bele too iha baze,” dehan nia.
Nia argumenta, ohin loron populasaun iha munisipiu sira komesa aumenta, tanba nee kazu mos aumenta, presiza duni estabelese Tribunal iha neeba atu julga prosesu sira nee.
(ter)
