DILI, STLTIMORLESTE.com – Prezidente Republika (PR), Jose Ramos hatete, integrasaun ba ASEAN nee loke oportunidade ba Timor Leste (TL), hahu husi kooperasaun ekonomiku no seluk tan.
Xefe Estadu hatoo kestaun nee liu husi nia diskursu, bainhira partisipa iha eventu loron Masakre Santa Kruz no loron Juventude ba dala 33, iha Santa Kruz, Balide, Dili, Tersa (12/11/2024).
“Iha parte seluk Timor Leste nia integrasaun iha Asosiasaun Nasaun sira Sudeste Aziatiku nian (ASEAN) loke oportunidade oin-oin ba ita nia rain, hahu husi kooperasaun ekonomika no akademika too hametin lasu komersial no kultural sira. Ida nee hanesan momentu ida neebe uniku, neebe ezije juventude sira atu prepara didiak ba dezafiu no oportunidade sira husi merkadu komun ho abitante liu milhaun atus hitu (700) no PIB ida liu dolar triliaun tolu (3),” katak PR, Horta.
Prezidente Republika apela ba foinsae Timoroan sira atu investe iha formasaun profisional, teknika no akademika neebe permite ita atu partisipa tomak iha espasu rejional idanee. Ho atensaun espesial ba area sira ekonomia verde no azul nian, joven sira iha Timor Leste bele kontribui ba dezenvolvimentu sustentavel iha area agrikultura, peska, turizmu, no konservasaun ba rekursu natural sira.
Dezenvolve abilidade atu opera iha merkadu idanee ezije dedikasaun no vizaun ba futuru, no esensial atu garante katak Timor Leste aproveita oportunidade empregu, investimentu no inovasaun foun.
Tanba sira neebe halo parte lha diaspora Timoroan no kontribui ho kompromisu, sakrifisiu no dedikasaun ba moris diak família nian liu husi remesa finanseira, hatoo rekonhesimentu no agradesimeritu klean liu. Apoiu finanseiru neebe haruka, rezultadu husi servisu makaas no kolen, reforsa ekonomia familia siranian, apoia oan sira nia edukasaun, no tulun atu garante seguransa aihan komunidade barak nian, sai nuudar airiin fundamental ba sustentabilidade rain nian.
(eme)
