BAUKAU, STLTIMORLESTE.com – Autoridade Munisipiu Baukau presiza haree invazaun foun neebe daudaun invade iha merkadu Munisipiu Baukau, tanba hadau faan sasan retalhu ho vendedores no empreza lokal sira.
Tuir Visi Prezidente CCI-TL Munisipiu Baukau, Vasco Baptista de Oliveira katak, hahu loron 19 Novembru 2024, neebe Autoridade Munisipiu inisia muda vendedores lokal sira husi merkadu tuan Vila Nova ba merkadu foun Tuanau, entidades hotu koopera ho prosesu refere, tanba hakarak kontribui ba dezenvolvimentu iha Munisipiu.
Maibe iha loron 21 Novembru 2024, CCI-TL Baukau simu reklamasaun preokupante husi Asosiasaun Vendedores Baukau hasoru espansaun inaseitavel ba negosiante husi estranjeiru liu-liu dominante husi Xineza neebe kontinua halo negosiu ho tipu retalhu iha Baukau, neebe espesifikamente lokaliza iha Postu Administrativu Baukau Vila, Suku Tirilolo, Aldeia Lutumutu hamutuk fatin negosiu 8 no 1 iha Postu Vemasi.
“Xineza sira neebe faan sasan baibain, buat nee Timoroan bele halo la presiza Xineza, tanba sira nee husi area Nasaun ida ba Nasaun seluk nee sai investidor, laos faan sasan kiik, ami nia pozisaun la aseita Xineza sira neebe mai hanesan pedagang kaki lima, tanba nee merkadu foun neebe Governu prepara ona, ami husu ba Governante lokal sira nia apoiu haruka fila Xineza sira nee ba iha Dili,” dehan Vanco ba jornalista sira, iha Vila Antiga, Baukau, Sesta (22/11/2024).
Visi Prezidente CCI-TL Baukau nee husu Autoridade Munisipiu Baukau atu inisia planu no orienta Xineza refere ba halo negosiu iha Kapital Dili, tanba sasan hirak neebe vendedores sira faan iha Munisipiu Baukau, maioria sosa husi sira nia maluk Xineza neebe halo negosiu iha Dili, maibe seluk faan too iha Baukau, nee fo impaktu ba vendedores no empreza lokal sira, tanba faan sasan retalhu ho Baukau oan sira.
Tanba tuir lo-loos Xineza hirak neebe prezensa iha Timor tenke halo investimentu ho volume, nunee bele emprega Timoroan sira liu nain 200 asesu kampu trabalhu, maibe mai ho faan retalhu hodi emprega deit Timoroan too nain 50, empreza Baukau oan iha kapasidade atu fo oportunidade, maibe merkadu livre mak kontinua fo espasu ba Xineza sira hamate empreza lokal sira neebe akontese ona iha sidade Dili.
Iha sorin seluk, Prezidente Asosiasaun Merkadu Baukau (AVMB,) Daniel Soares dos Santos mos husu Autoridade Munisipiu Baukau nia responsabilidade ba ezijensia neebe vendedores sira hatoo ona iha fulan hirak ba kotuk liu enkontru katak, bainhira Autoridade Munisipiu Baukau muda sai ona vendedores sira husi merkadu tuan Vila Nova no Vila Antiga, sei haruka mos Xineza hirak neebe durante halo negosiu iha Baukau fila ba Dili.
Hafoin iha loron 19 Novembru Autoridade Munisipiu Baukau liu husi ekipa konjunta, kompostu husi Komando Polisia Munisipiu Baukau, F-FDTL, BOP, Seguransa Sivil no Autoridade Sivil seluk tan muda ona vendedores sira, maibe Xineza hirak neebe halo negosiu iha Baukau, Autoridade Munisipiu seidauk haruka fila ba Dili no hahu hetan ona fatin iha mudansa merkadu refere.
Hatan ba kestaun nee, Sekretariu Munisipiu Asuntu Planeamentu Investimentu No Dezenvolvimentu Integradu, Eduardo Filipe Ximenes argumenta, prosesu muda Xineza sira husi Baukau ba Dili, Autoridade Munisipiu presiza haree prosesu legais sira, tanba Autoridade seidauk simu keixa husi empreza no vendedores Baukau oan sira.
Nia rekonhese, prezensa Xineza sira faan sasan retalhu ho vendedores lokal sira iha Baukau, nee fo impaktu, nunee husu CCI-TL Baukau no Asosiasaun Merkadu Baukau atu hatoo pedidu kontestasaun hodi Autoridade Munisipiu haree prosesu ba oin.
(EST 2)
