DILI, STLTIMORLESTE.com – Investigador husi Polisia Sientifika Investigasaun Kriminal (PSIK) nain 13 presta deklarasaun iha KAK, liga ho kazu saida Diretor la iha konhesimentu.
“Hau la presta deklarasaun, ita nia investigador sira mak ba presta deklarasaun hanesan sasin,” dehan Diretor PSIK, Vicente Fernandes Brito ba jornalista sira iha MF, Segunda (09/12/2024).
Nia hatutan, kona-ba saida nia parte la hatene ida, maibe nia parte autoriza duni investigador nain 13 ka 14 mak ba presta deklarasaun.
PSIK nee kuandu nia asumi iha 2015 buat ida la iha, maibe agora forte loos tanba halo aprensaun ba kazu balu. No atu kombate krime organizadu labele koalia, servisu deit no nia parte prontu hodi servisu.
KAK la iha autoridade bolu nia, no hanesan Majistradu, Ministeriu Publiku bele bolu, tanba nia hanesan Majistradu Judisial iha prosedimentu propriu atu regula.
Maibe abuzu poder akontese kuandu benefisiu ba nia aan, maibe se jere interese publiku la eziste, tanba abuzu poder iha intensaun atu hetan benefisiu ba nia aan.
Iha fatin ketak, Komisariu KAK, Rui Pereira dehan, kazu sira nee sei iha prosesu hela, no iha nasaun nee keixa ruma hasoru se se deit, se tama iha kompetensia KAK nian KAK halo prosesu investigasaun, se tama iha kompetensia PSIK nian sira mak sei halo investigasaun, se tama iha kompetensia PNTL nian sir mak sei halo investigasaun.
“Komisariu labele temi deit ida PSIK, ami sei halo prosesu hela indentifika bolu se se mak bele mai presta deklarasaun, tanba servisu investigasaun kriminal ita hateten ema nee envolve presiza provas, no provas mai husi testemunha no dokumentus sira neebe hatudu,” dehan Komisariu KAK, Rui.
(ter)
