DILI, STLTIMORLESTE.com – Institutu Politeknik Betano (IPB) hasoru difikuldade ba infraestrutura, tanba sala aprendizajen limitadu inklui laboratóriu.
Lia hirak nee hatoo husi Prezidente Institutu Politenik Betano (IPB), Acacio Cardoso Amaral ba STL, Kinta (09/01/2025).
“Difikuldade hanesan instituisaun foun neebe dala barak ami hasoru mak ligadu ho problema infraestrutura ninia, infelizmente infraestrutura bazika iha hela, maibe hanesan agora ami uza daudaun nee falta laboratoriu. Tinan-tinan ami tenta ho orsamentu neebe mak aloka mai iha IPB, ami tenta loke tender para kompanhia sira tuir tender konhesimentu, maibe dala barak falha,” dehan Acacio.
Acacio dehan, sira mos iha problema kona-ba fornesimentu ba sira nian livru iha biblioteka, tanba tinan-tinan sira loke no kompanhia sira mai, maibe too ikus sira mos la fornese livru, tanba deit dehan susar atu sosa livru sira nee, liu-liu livru sira neebe ho lian portugues nee la fasil hetan iha Timor.
“Entaun tenke ba sosa iha rai liur, nee ho montante orsamentu neebe kiik, dala barak kompanhia sira dada aan, agora ita atu tau osan boot, maibe ita nian osan limitadu, ami iha sala sia, maibe sala neebe ami uza nee sala lima (5) deit, seluk nee ami uza edifisiu dosente sira, laboratoriu, nee duni ami nian sala seidauk sufisiente,” nia afirma.
(jac)
