BAUKAU, STLTIMORLESTE.com – Projetu konstrusaun sistema irigasaun Waidasu-Fatumaka iha Suku Uma Ana Iku, Postu Administrativu Venilale, Munisipiu Baukau, neebe Ministru Agrikultura Pekuaria Peska no Floresta (MAPPF) inaugura iha fulan Janeiru tinan nee hahu aat fali ona, tanba deskonfia laiha kualidade ba konstrusaun.
Xefe Suku Uma Ana Iku, António da Costa Freitas esplika, projetu konstrusaun irigasaun refere konstrui husi kompanhia lokal neebe kontratu husi Governu neebe konstrusaun fiziku finaliza iha tinan 2025 no hetan ona inagurasaun iha fulan Janeiru tinan nee, ofisialmente inaguradu husi MAPPF neebe akompanha husi Prezidente Autoridade Munisipiu (PAM) Baukau, akompanha mos husi entidades sira seluk, maibe irigasaun refere seidauk fo benefisiu diak ba komunidade agrikultores sira iha Suku refere, tanba iha parte balu hahu aat ona.
“Irigasaun Waidasu ita haree ba kualidade projetu nee ita kategoria progresu neebe lao la diak, tanba la identifika sasan neebe mak uza ba asegura nia kualidade nee, hanesan rai henek sira kahur ho tahu ten too iha agora komesa nakfera aat pior liu tiha ona,” Xefe Suku Uma Ana Iku, António da Costa Freitas hateten ba jornalista sira iha salaun apuramentu Vila Nova Baukau, Sesta (27/03/2026).
Nia sublina, irigasaun refere hahu nakfera, tanba elementus ba konstrusaun neebe parte kompanhia utiliza hanesan rai henek neebe kahur ho sementi laiha kualidade, tanba nee hafoin remata serimonia inaugura irigasaun refere hela afeta ba kondisaun nakfera.
Nia fundamenta, kondisaun irigasaun refere neebe parte Autoridade Suku halo identifikasuan nakfera iha parte 5 neebe kategoria grave neebe presiza halo normalizasaun.
“Dehan kompanhia sei rai osan 10% atu halo manutensaun ba ida nee, neebe ami autoridade hein deit, para aat iha neebe nee hadia ida nee,” António salienta.
Nia dekalara, parte kompanhia presiza duni halo manutensaun ba irigasaun refere, tanba aleinde kondisaun nakfera, irigasaun refere mos labele fo asesu bee ba komunidade agrikultores sira nia natar no toos iha Aldeia Wetunau no Keleborowai ba tempu bailoron mai.
“Agora bee lao maibe depende ba udan deit, se udan makaas bee lao, maibe udan menus bee la asesu ba komunidade nia natar, tanba ita haree iha bee matan nee sira foti tuun liu tiha, depois fatin ba bee tuir ba asesu natar no toos nee sae fali, entaun bee menus labele fo asesu ba komunidade sira,” António haktuir.
Nia argumentu, mezmu irigasaun refere atual kondisaun nunee, maibe Autoridade Suku garante parte kompanhia sei halo normalizasaun, tanba tuir kontratu neebe iha parte Governu seidauk fo kompletu orsamentu ba projetu refere ba kompanhia implementador.
Too notisia nee publika, STL seidauk hetan konfirmasaun husi kompanhia implementador projetu konstrusaun irigasaun Waidasu.
Entretantu tuir nota informativu neebe STL asesu, irigasaun refere fo asesu bee ba natar hektare 50, responsabiliza husi kompanhia ROZI CO Unip.LDA ho total orsamentu rihun US$ 180.
(tom)
