DILI, STLTIMORLESTE.com – Tinan nee Instituto Superior Cristal (ISC) hetan subvensaun públika husi Ministériu Ensinu Superior Siensia no Kultura (MESSK), maibe seidauk foti karta husi Ministériu refere, atu nunee bele submete sira nian proposta.
Lia hirak nee hatoo husi Reitor ISC, Sebastião Pereira ba STL iha nia knaar fatin, Segunda nee (23/03/2026).
“Tinan ida nee ami hetan subvensaun públika, maibe ami seidauk halo proposta no ami seidauk simu karta husi MESSK, maibe ami hetan subensaun públika, tanba nee hein karta husi MESSK para ami bele halo proposta ba Ministeriu refere, nee duni depois mak ami nia ema ba foti karta ida nee,” katak nia.
Sebastião dehan, kona-ba uza subvensaun tau prioridade ba saida, nee sei hein lai karta husi ministériu, ho nunee hafoin bele hatene subvensaun nee sei tau prioridade ba saida, nee duni governu liu husi MESSK apoiu subvensaun ida nee ba ensinu superior sira iha rai laran.
Nunee mos Reitor Instituto Ciensia Saude (ICS), Leao Borges hatete, agora daudaun ICS prepara hela proposta subvensaun nian hodi bele submete ba ministériu, tanba data ikus hatama proposta nee bainrua, nee hanesan baibain, sei fo apoiu ba ekipamentus mediku nian, laboratoriu ninia, nomos fo apoiu ba dosentes no estudantes sira.
“Kona-ba subvensaun ba tinan ida nee ami simu ona karta husi MESSK, agora ami prepara hela ami nian proposta atu hatama, montante subvensaun ba tinan ida nee hamutuk quarenta novi mil sesentus binte quadro. Ami simu ona karta husi MESSK, nee duni agora daudaun ami prepara hela ami nian proposta submete ba ministériu refere,” nia informa.
Iha fatin seluk, Reitor East Timor Coffee Institute ( ETCI), Mateus Maia de Jesus antes nee dehan, iha tinan 2025, East Timor Coffee Institute ( ETCI) la hetan subvensaun públiku tanba hetan transformasaun.
“Hau hanoin kona-ba subvensaun, ami nian relatóriu hatama iha loron 15 Janeiru tinan 2025, maibe ida nee subvensaun neebe mak ami hetan husi MESSK iha tinan 2024 ninia, nee ami hatama ratoriu tuir kalendariu ministeriu nian. Ami iha 2025 la hetan subvensaun públika husi MESSK, tanba hetan transformasaun, tanba nee ba tinan 2025 ami la hetan subvensaun,” nia dehan.
(jac)
