BAUKAU, STLTIMORLESTE.com – Institutu Superior Cristal koloka estudante hamutuk nain 594 husi Fakuldade Siensia Saude halao estajiu iha Munisipiu Baukau.
“Agora daudaun estudante neebe ita koloka mai Munisipiu Baukau atu halo estajiu nee hamutuk 594 kompostu husi estajiu tolu, estajiu nesesidade baziku umana, espesializasaun no estajiu komunitariu,” hateten Visi dekanu Fakuldade Siensia Saude husi Institutu Superior Cristal, Muhamad Syarifudin ba jornalista sira hafoin entrega estudante estajiariu sira ba Autoridade Munisipiu Baukau, iha Vila Nova Baukau, Tersa (27/05/2025).
Nia esplika, estajiu nesesidade baziku umana partisipa husi estudante semestre tolu hamutuk nain 117, kompostu departamentu parteira 79 no enfermajen 38, estajiu espesializasaun partisipa husi estudante semester lima hamutuk nain 276, kompostu parteira 145 no enfermajen 131 neebe sei halao estajiu iha durante fulan rua iha Hospital Rejional Eduardo Ximenes Baukau.
Enkuantu estajiu komunitariu partisipa husi estudante semester 7 hamutuk nain 201 kompostu parteira 27 no enfermajen 174 sei halao estajiu iha Suku Ostiku no Loilubu, Postu Administrativu Vemasi durante fulan rua.
“Objetivu husi estajiu nee ba saude familia no saude adoltu ema idozu sira, atu eleva sira nia kapasidade hasoru komunidade sira. Esperansa durante fulan hira nee estudante sira bele aproveita momentu sira nee aprende buat barak sai bukae ba futuru,” akresenta Visi dekanu nee.
Estajiaria Celijia da Costa Guterres konsidera, estajiu nuudar pasu importante ba estudante Universitariu sira, tanba liu husi estajiu bele kompleta liu tan teoria sira neebe aprende ona iha faze prosesu aprendizajem husi semestre inisiu.
“Ami prontu ona atu ba halo promosaun ajuda komunidade sira, tanba iha kampu ami prepara ona oinsa kuidadu ba inan sira no ba familia sira neebe hetan difikuldade iha komunidade,” katak Celijia.
Reprezentante Prezidente Autoridade Munisipiu Baukau, atual Sekretariu Munisipal Planeamentu Investimentu No Dezenvolvimentu Integradu, Eduardo Filipe Ximenes argumentu, prosesu estajiu kada estudante sei hasoru difikuldade, tanba hasoru ambiente foun, maibe liu husi difikuldade mak tane no fortifika mentalidade kada estudante ida atu esforsu liu tan hasoru prosesu estudu sira.
“Laiha ema ida moris la enfrenta difikuldade, sempre iha difikuldade, maibe sukat husi difikuldade nee fokus ba imi nia estudu, hanesan Autoridade husu dentru estajiu ba objetivu, atividade neebe laiha relasaun ho imi nia atividade labele tuir,” Eduardo enkoraja estudante estajiariu sira husi ISC.
Nia husu estudante estajiariu sira atu obdese deit ba regras neebe Institutu Superior Cristal lansa ona iha fatin estajiu no kumpre deit atividade Suku, Postu no Munisipiu bainhira implementa programa husi Governu Sentral, tanba nee la autoriza estudante sira atu tuir atividade partidu politiku no arte marsiais nian durante sei halao estajiu iha Munisipiu Baukau.
Maibe bainhira Autoridade Munisipiu detekta estudante sira kontra regras hanesan tuir atividade partidu politiku no arte marsiais iha baze, liu liu iha Suku Ostiku no Loilubu, Autoridade sei la tolerara.
Enkuantu koloka estudante nain 594 atu halao estajiu iha Munisipiu Baukau nee, hahu ho selebra akordu entre Magnifiku reitor ISC no Autoridade Munisipiu neebe selebra iha salaun apuramentu Baukau hafoin kontinua entrega estudante hirak nee ba Hospital Rejional Eduardo Ximenes, inklui Suku Ostiku no Loilubu, neebe estudante sira sei halao estajiu durante fulan rua, neebe hahu iha loron 27 Maiu tinan nee too remata.
Entretantu serimonia koloka estudante estajiu hirak nee hetan partisipasaun masimu husi Autoridade Suku Ostiku no Loilubu, Autoridade Postu Vemasi, Xefe Sentru Saude Loilubu no entidade seluk tan.
(tom)
