BAUKAU, STLTIMORLESTE.com – Durante fulan Abril tinan nee, Sentru Saude Tirilolo Munisipiu Baukau simu pasiente hamutuk nain 916 neebe maioria afeta ba moras Infesaun Respiratoriu Aguda (ISPA).
“Fulan Abril nia laran husi dadus konsulta jeral neebe iha, ami rejista kazu tolu neebe mak aas iha Sentru Saude Tirilolo, primeiru mak ISPA,” hateten Xefe Sentru Saude Tirilolo, Luíza da Costa Belo ba STL iha knaar fatin, Kinta (22/05/2025).
Nia esplika, moras tolu refere mak hanesan Infesaun Respiratoriu Aguda rejistu pasiente nain 766, Diarea nain 81 no moras Pneumonia rejistu pasiente nain 69 kompostu husi labarik idade bebe too ema adultu.
Nia sublina, moras tolu refere afeta ba pasiente sira kauza hanesan impaktu husi mudansa klimamatika, atetude pesoal fuma, ambiente la saudavel, konsumu hahan neebe la ijiene no seluk tan, maibe laiha kondisaun moras grave.
“Balun neebe hanesan pneumonia iis boot neebe makaas ami tenke refere ba iha HoREX, maibe la kauza neebe grave liu,” Luíza akresenta.
Nia fundamenta, durante fulan Abril, Sentru Saude Tirilolo transfere pasiente balun ba Hospital Rejional Eduardo Ximenes Baukau hodi kontinua hetan tratamentu, tanba fasilidade iha Sentru Saude Tirilolo laos kategoria internamentu, maibe simu pasiente hodi observa kondisaun saude durante oras rua.
Entretantu husi pasiente nain 916, rejistu husi Suku Tirilolo, Bahu, Kaibada, Buruma, Kaibada Makasae no Buibau, tanba nee Servisu Saude Munisipal liu husi Sentru Saude Tirilolo no Postu Saude sira nafatin halo promosaun liu husi avizu, maibe atu reduz liga fila fali ba komunidade sira nia konsiensia.
(tom)
