DILI, STLTIMORLESTE.com – Komandante Vulnerable Person Unit (VPU) Nasional, Ricardo da Costa hatete, husi fulan Janeiru, Fevereiru tinan 2025, VPU Nasional rejistu kazu 240.
Komandante VPU Nasional, Ricardo da Costa hatoo lia hirak nee liu husi nia intervensaun, iha enkontru ho Rede Referal sira iha salaun Maria Goreti, Kaikol, Dili, Tersa (18/03/2025).
“Iha Janeiru rejistu 123 no iha Fevereiru rejistu 117, hau la konsege fahe ba kazu violensia domestika ho violensia seksual tanba loron rua liu ba ami sistema online falha tiha entaun ami labele asesu ba internet, ida nee mak hau fo hatene,” katak Komandante VPU Nasiona nee.
Iha biban nee, Komandante mos hatoo preokupasaun kona-ba kazu balu neebe feto sira hasoru iha familia, oinsa mak fo hanoin ba rede referral sira hodi diskute hamutuk hodi buka solusaun.
“Iha kazu ida mos presiza fahe, iha nee defensor sira no rede referal sira bele haree kazu ida nee bele apoiu netik, kazu nee lo-loos labele akontese maibe tanba nesesidade akontese, koalia mai hau hakarak dada maibe hau ema prosesu nia neebe labele dada hau sei refere fali ba ita boot sira ba Alfela no Defensor Publika no MSSI hodi haree kazu nee nia lalaok, tanba nia inan mak fahe fali nia oan, tanba saida mak akontese ida nee, tanba nia oan isin rua nia laen lao lakon tiha, entaun ho nesesidade hirak nee nia tenke oferese nia oan ba fatin ida nee, maibe depois halo investigasaun la konsege akontese maibe too duni ona fatin nee duni, maibe la konsege neebe orsida defeza sira haree took asuntu nee,” dehan nia.
Komandante nee hatete, mekanizmu atu halo prevensaun ba kazu sira nee tuir Komandante nia hanoin tenke tama barak liu ba iha estudante sira, atu nunee estudante sira mos bele ajuda ekipa referal hodi bele influensia fali ba inan aman sira.
Nunee mos Xefe Gabinete IJI PNTL, Maria Fatima Martins hatutan, husi Gabinete Igualidade Jeneru hamutuk ho PNTL nafatin halo prevensaun ba iha munisipiu sira.
“Hau hakarak dehan deit iha prevensaun nia husi ami glGabinete Igualdade Jeneru ho polisia ho ami ami nia kolega seluk ami halao ona prevensaun iha Munisipiu Aileu, Ainaro, Manufahi, Lautem no Baukau no hahu iha fulan Janeiru,” katak nia.
(eme)
