DILI, STLTIMORLESTE.com – Ministeriu Edukasaun (ME) liu husi rekursu umanu nasional sei koloka bolsa kandidatu profesores tinan 2024 ba nivel ensinu baziku iha Janeiru 2026, tanba bolsa kandidatu hirak nee sei substitui hikas profesores reforma.
Kestaun nee hatoo husi Diretor Nasional Rekursu Umanu iha ME, João Amaral ba STL, Tersa (02/12/2025).
“Ita nian bolsa kandidatu profesores tinan 2024 ba nivel ensinu baziku daudaun nee iha bolsa nia laran hamutuk 912. Sira nee Janeiru 2026 ba oin nee ita sei koloka dala ida deit, para bele substitui fali ita nian profesores sira neebe mak Janeiru sei tama iha reforma obrigatoriu ninia,” nia komenta.
Tuir João katak, bolsa kandidatu profesores nivel ensinu baziku 912 nee sei koloka iha Janeiru ano letivu foun, tanba nee depois nee halo reforma obrigatoriu ba profesores sira, nee mak koloka bolsa kandidatu profesores 912 nee substitui hikas iha sira nia fatin, nee koloka ba iha nivel ensinu baziku iha teritoriu laran.
Iha fatin seluk, Julio da Silva hanesan Diretor Servisu Edukasaun Munisipiu Likisa dehan, profesores 30 resin nee maka sira tama reforma obrigatoriu, tanba nee sira nian idade avansadu los ona, no sira hanorin iha ensinu baziku, agora atu substitui iha sira nian fatin, nee kompetensia ME nian bazeia ba rekrutamentu profesores neebe mak daudaun nee iha bolsa, sira bele substitui profesores reforma.
“Difikuldade neebe ami enfrenta maka ita nian profesores idade avansadu sira nee, tanba ita nian profesores idade avansadu nee ema tenke troka ona, maibe ida nee kompetensia husi Ministériu ninia, tanba sira maka sei halo kolokasaun ita nian profesores 30 resin, sira nee obrigatoriu.
Entretantu Diretor Servisu Edukasaun Munisipiu Ainaro, Patricio da Costa Magno hatete, profesor iha Ainaro mos hamutuk 129 mak tama ona ba idade reformadu ninia, tanba sira idade tiha ona.
Iha Ainaro profesor hamutuk 129 mak tama ba idade reformadu kompostu husi mane 79, feto 50. Husi nivel pre-eskolar nain 4, ensinu baziku 120, ensinu sekundariu jeral 5.
Jornalista: Jacinta Sequeira
Editora: Domingas Gomes
